थपियो अमेरिकामा यात्राकालागि भिजिटर भिसा लिन नपर्ने देशको संख्या
प्रकाशित मिति : कार्तिक २०, २०७६ बुधबार
अमेरिकाले आफ्नो देश भ्रमणका लागि कन्सुलेट वा दूतावासबाट भिजिटर भिसा लिन नपर्ने देशमा पोल्याण्डलाई थपेको छ । नोभेम्बर ११ देखि लागु हुनेगरी पोल्याण्डका नागरिकले अमेरिकामा भ्रमणका लागि आउँदा अनलाइनमार्फत भिसा छुटको आवेदन दिन सक्नेछन् ।
त्यसका लागि उनीहरुले इलेक्ट्रोनिक सिस्टम फर ट्राभल अथोराइजेशन इस्टामार्फत अमेरिका यात्रा गर्नुभन्दा कम्तीमा ७२ घण्टा अगाडि अनलाइनमार्फत आवेदन दिनुपर्नेछ । यसरी आवेदन दिइसकेपछि उनीहरु ९० दिनसम्म अमेरिकामा यात्रा गर्न र बी वान भिसामा गर्न पाउने गतिविधि गर्न योग्य हुनेछन् ।
भिसाका साटो अनलाइनमार्फत यात्रा अनुमतिका लागि आवेदन दिए पुग्ने देशको सुची यस्तो छ ।
यसअगाडि विश्वका ३८ देशका नागरिकले विना भिसा इस्टामार्फत अनलाइन आवेदन दिएर अमेरिकाको यात्रा गर्न पाउने प्रावधान छ । अब त्यो सुचीमा पोल्याण्ड पनि थपिएको हो । अनलाइनमार्फत यात्रा अनुमति लिएपछि उक्त अनुमति पासपोर्ट अद्यावधिक रहेसम्म २ बर्षका लागि काम लाग्छ । यदि २ बर्षको बीचमा पासपोर्ट एक्सपायर भएमा भने नयाँ यात्रा अनुमतिपत्रका लागि अनलाइन आवेदन दिनुपर्छ ।
यदि विगतमा कानुन कार्यान्वयन वा अध्यागमन नीति नियमको पालनाका सन्दर्भमा समस्या भएका कुनै पनि व्यक्ति अनलाइनमार्फत यात्रा अनुमतिका लागि अयोग्य हुनसक्नेछन् । उनीहरुले भने अमेरिकी दूतावास वा कन्सुलेटबाट नै भिसा लिनुपर्ने हुन्छ ।
भिसाका साटो अनलाइनमार्फत यात्रा अनुमतिका लागि आवेदन दिन यहाँ क्लिक गर्नुहोला ।