महरालाई नियन्त्रणमा लिन जिल्ला अदालत काठमाडौंको आदेश
प्रकाशित मिति : आश्विन १९, २०७६ आईतबार
संसद सचिवालयमा कार्यरत आफ्नै कर्मचारी रोशनी शाहीलाई जबरजस्ती गरेको अभियोग लागेपछि पदबाट राजीनामा दिएका कृष्ण बहादुर महरालाई नियन्त्रणमा लिन अदालतले पत्र दिएको छ । आइतबार काठमाडौं जिल्ला अदालतका न्यायाधीश ब्रजेश प्याकुरेलको इजलासले महरालाई नियन्त्रणमा लिएर अनुसन्धान गर्न अनुमति दिएको हो ।
आदेशसँगै प्रहरीले महरालाई हिरासतमा लिएर सो घटनामाथि थप छानविन गर्ने बाटो खुलेको छ। अदालतबाट नियन्त्रण गर्ने अनुमति पाएको प्रहरीले सम्भवत आज साँझसम्म नै महरालाई नियन्त्रणमा लिनेछ।
जबरजस्ती करणीको प्रयास गरेको भन्दै रोशनी शाहीले शुक्रबार निवर्तमान सभामुख कृष्णबहादुर महराविरूद्ध प्रहरीमा उजुरी दर्ता गराएकी थिइन् । शाहीको मध्य रातको त्यो बयान पनि प्रहरीले रेकर्ड गरेर राखेको थियो।