डिभी विजेता नेपालीहरुलाई अगस्तमा सिमाबन्दी नलाग्ने
प्रकाशित मिति : जेष्ठ ३०, २०७६ बिहीबार
डिभी विजेता नेपालीहरुलाई आगामी अगस्तमा केस नम्बरमा कुनै सिमाबन्दी नलाग्ने भएको छ । अमेरिकी सरकारको विदेशमन्त्रालयले जारी गरेको भिसा बुलेटिन अनुशार आगामी अगस्त महिनामा कुनै पनि केस नम्बर भएका नेपालीहरुले डाइभर्सिटी भिसाका लागि प्रकृया अगाडि बढाउन सक्नेछन् ।
जुलाई महिनाका लागि भने ६ हजार २ सय ७५ सम्म केस नम्बर हुने नेपालीहरुलेमात्र भिसा प्रकृया अगाडि बढाउन सक्नेछन् । जुलाईका लागि नेपाल र इजिप्टका लागिमात्र सिमाबन्दी तोकिएको छ । तर अगस्त महिनाका लागि भने विश्वका कुनै पनि देशका डिभी विजेताहरुलाई सिमाबन्दी तोकिएको छैन ।
आर्थिक बर्ष २०१९ का लागि डिभी विजेताहरु सेप्टेम्बरको अन्त्यसम्ममा अमेरिकाको भिसा प्राप्त गरिसकेको हुनुपर्छ । सेप्टेम्बरको अन्त्यसम्ममा भिसा प्राप्त नगर्ने डिभी लोटरी विजेताहरु अमेरिका आउन पाउने छैनन् । उनीहरुको डिभी लोटरी स्वत खारेज हुनेछ ।
आर्थिक बर्ष २०२० का लागि डिभी जितेकाहरुले आगामी अक्टोबर १ बाट भिसा प्राप्त गर्नेछन् । गत मे महिनामा आएको परिणाममा डिभी जित्ने उनीहरुले सन् २०२० को सेप्टेम्बर अन्त्य सम्म भिसा प्राप्त गर्नेछन् । आफूलाई डिभी लोटरी परे नपरेको सरकारको आधिकारिक वेवसाइटमार्फत चेक गर्न सकिन्छ ।
आर्थिक बर्ष २०१९ का लागि ३६३३ जना नेपालीहरुलेमात्र डिभी लोटरी जितेका थिए । डिभी लोटरी जित्ने एउटा देशबाट अधिकतम लगभग ३७ सय जनालेमात्र भिसा प्राप्त गर्दै आएका छन् ।
