अमेरिकी अध्यागमनमा दर्जन परिवर्तनको योजनामा अमेरिकी सरकार
प्रकाशित मिति : जेष्ठ १३, २०७६ सोमबार
अमेरिकी सरकारको डिपार्टमेन्ट अफ होमल्याण्ड सेक्युरिटी, डिपार्टमेन्ट अफ स्टेट र डिपार्टमेन्ट अफ लेबरले अमेरिकी अध्यागमनमा दर्जन परिवर्तनको तयारी गरेका छन् । सरकारका ती एजेन्सीहरुले आगामी ६ महिनामा गर्ने परिवर्तनको खाका तयार गरेका हुन् ।
एचवानबी भिसा वाहकका दम्पत्तिलाई प्रदान गरिदै आएको एच फोर भिसा वाहकका लागि वर्क परमिट अन्त्यका लागि यसै महिनाको अन्त्यमा नीति ल्याउने तयारी गरिएको छ । यो नीति प्रकाशित भइसकेपछि ३० देखि ६० दिनसम्मको कमेन्ट अवधि राख्ने र त्यसपछि लागु गर्ने योजना रहेको छ । अहिले यो प्रस्ताव बजेट र व्यवस्थापन कार्यालयले पुनरावलोकन गरिरहेको जनाइएको छ ।
त्यस्तै एचवानबी भिसाका लागि योग्यता र तलबको मापदण्डमा परिवर्तन गर्ने गरी नयाँ नीति ल्याउन लागिएको छ । जुन नीति आगामी अगस्त महिनामा सार्वजनिक प्रतिकृयाको लागि प्रकाशित गरिने भएको छ ।
अमेरिकी सरकारले एचवान बी क्याप दर्ताको शुल्क पनि बढाउने तयारी गरिरहेको छ । त्यस्तै कामदार भिसा एचवान बीको आवेदन शुल्क पनि बढाउने तयारी भइरहेको छ । यो नियम जुलाईमा प्रकाशित हुने अपेक्षा गरिएको छ । सन् २०२० को सुरुमा एचवान बीका लागि दर्ता खुल्दा कार्यान्वयन हुनेछ ।
लगानीमा आधारित ईबी फाइभ कार्यक्रमका सन्दर्भमा पनि न्यूनतम लगानीको रकम बढाउने गरी नयाँ नियमको तयारी भइरहेको छ । यो नियम अहिले पुनरावलोकन भइरहेको र छिट्टै प्रकाशित हुने जनाइएको छ ।
त्यस्तै ग्रिनकार्डको आवेदनका सन्दर्भमा पनि परिवर्तन ल्याउने तयारी भइरहेको छ । एक्स्ट्राअर्डिनरी वा रोजगारमा आधारित ग्रिनकार्ड आवेदन दिंदा आई १४० आवेदनसहित ग्रिनकार्ड आवेदन फाइल गर्न पाइने प्रावधानलाई हटाएर आई १४० आवेदनमात्र फाइल गर्न पाइने नियम ल्याउने तयारी भइरहेको छ ।
त्यस्तै विद्यार्थी भिसाका सन्दर्भमा अमेरिका रहने अवधिका सन्दर्भमा डीएस अर्थात ड्युरेशन अफ स्टेटस दिइदै आएकोमा निश्चित मिति नै उल्लेख गर्ने तयारी भइरहेको छ । यसअगाडि विद्यार्थी लगायतका केही भिसामा आउनेहरुका लागि डीएस स्टेटस प्रदान गरिदै आएको थियो । त्यस्तै एफ, एम र जे भिसा वाहकले तिर्ने स्टुडेण्ड एण्ड एक्सचेन्ज भिजिटर प्रोग्रामको शुल्क बढाउने तयारी भइरहेको छ । यो नियम जुन २४, २०१९ बाट लागु हुने जनाइएको छ ।
अमेरिकी विदेश मन्त्रालयले बिजनेश र पर्यटक भिजिटर भिसा बी वान बी टुका लागि योग्यतामा पनि परिवर्तनको तयारी गरेको छ । जसका लागि आगामी अक्टोबरमा नियम प्रकाशित गर्ने जनाइएको छ । राष्ट्रपति डोनाल्ड ट्रम्पले भिजिटर भिसामा आउनेको ओभरस्टे घटाउनेगरी योजना ल्याउन निर्देशन दिएपछि त्यसमा कडाई गर्ने तयारी भएको हो ।
त्यस्तै युएससीआईएसका कैयन आवेदनमा शुल्क बढाउने तयारी गरिएको छ । आप्रवासी र गैरआप्रवासी भिसाका लागि शुल्क बढाउने तयारी गरिएको र यसबारेको नियम जुलाईमा प्रकाशित गरिने जनाइएको छ ।
त्यस्तै अमेरिकामा सरकारी सुविधा खाने सम्भावना भएकाहरुलाई ग्रिनकार्ड वा अन्य भिसा अस्वीकार गर्न सकिने गरी आगामी सेप्टेम्बरमा नयाँ नियम ल्याउने तयारी भइरहेको छ । आप्रवासीले अमेरिकामा सरकारी सुविधा खाएमा त्यो रकमको क्षतिपूर्ति स्पोन्सरकर्ताबाट गराउने गरी राष्ट्रपति ट्रम्पले यस अगाडि नै मेमो समेत जारी गरिसकेका छन् ।