कार्यकारी आदेशपछि अमेरिकी नागरिकता नहुनेले ध्यान दिनुपर्ने ७ कुरा
-ज्यासन जुबो
१, त्यत्तिकै नआत्तिनुहोस् । अमेरिकामा हरेक राष्ट्रपतिलाई कार्यकारी आदेश दिने अधिकार हुन्छ । तर उनीपनि कानुनले बाँधिएका हुन्छन् । कार्यकारी आदेश कार्यान्वयनका लागि श्रोतसाधनले बाँधिएका हुन्छन् । त्यसैले उनले गर्नसक्ने कामको पनि सिमा हुन्छ । अमेरिकामा एसाइलम प्रणाली र अध्यागमन अदालतहरु अझै पनि कायमै छन् । धेरै मान्छेहरुलाई एकैपटक प्रणालीमा धकेल्दा प्रणालीमा अझै सुस्तता आउँछ ।
२, अमेरिकामा भौतिक रुपमा आइसकेका व्यक्तिलाई सरकारसँग सिधै देशनिकाला गर्ने अधिकार छैन । व्यक्तिलाई देश निकाला गर्नका लागि पनि निश्चित कानुनी प्रकृया रहेको छ । अदालतमा सुनुवाई हुनुपर्छ । सुनुवाईपछि व्यक्तिले अपिल गर्न पाउने अधिकार छ । त्यसैले कोही पनि व्यक्ति त्यत्तिकै अमेरिकाबाट एकैचोटी देशनिकालामा पर्दैन । सामान्यतया तीब्र गतिको प्रकृया अपनाउँदा समेत यो प्रकृया पूरा हुन महिनौं लाग्छ ।
३, कार्यकारी आदेशमा अमेरिकामा कानुनी रुपमा प्रवेश गरेका व्यक्तिलाई देशनिकाला गर्ने सम्बन्धमा कुनै कुरा उल्लेख छैन । त्यसैले कुनै अपराध नगर्दासम्म एसाइलम गरेका र ग्रिनकार्ड लिएका व्यक्तिलाई कुनै समस्या देखिन्न ।
४ एसाइलमको केस पेन्डिंग रहेकाहरुको सन्दर्भमा पनि यो कार्यकारी आदेशले तत्कालिन रुपमा कुनै प्रभाव पार्ने देखिन्न । कार्यकारी आदेशमा अध्यागमन सुविधाबारे थप कुरा स्पष्ट हुन बाँकी नै छ । त्यसैले यसमा एसाइलम समावेश हुन्छ वा हुँदैन अहिले नै भन्न सकिन्न । एसाइलम आवेदनको सन्दर्भमा पनि इराक, सिरिया, सुडान, इरान, सोमालिया, यमन, लिबिया लगायत मुस्लिम बाहुल्य रहेको देशका व्यक्तिको आवेदन प्रकृया केही लामो हुनसक्छ । किनभने कार्यकारी आदेशले ती देशका व्यक्तिका सम्बन्धमा अध्यागमन सुविधालाई पनि केहीसमय प्रतिबन्ध लगाएको देखिन्छ ।
५ आगामी दिनमा के हुँदैछ भन्ने विषयमा स्पष्ट अबधारणा नआउँदासम्म एड्भान्स परोल (अग्रिम जमानी) मा अमेरिका बाहिर यात्रा गर्ने योजना त्याग्नु उपयुक्त हुन्छ । यदि यात्रा गर्नेपर्ने अवस्था भएमा फर्कने बेलामा कुनै समस्या नआओस् भन्नका लागि आफ्नो वकिलसँग राम्रोसँग छलफल गर्न जरुरी छ ।
६ इराक, सिरिया, सुडान, इरान, सोमालिया, यमन, लिबियाका व्यक्तिले ग्रिनकार्ड नै भएपनि अमेरिका बाहिर यात्रा नगर्नु उपयुक्त हुन्छ । ती देशबाट आएका व्यक्तिका सन्दर्भमा स्थीति स्पष्ट छैन । यदि तपाई यी देशबाट हुनुहुन्छ, अहिले अमेरिका बाहिर हुनुहुन्छ र ग्रिनकार्ड पनि छ भने यथाशक्य अमेरिका फर्कनु उपयुक्त हुन्छ । कम्तीमा अमेरिकी दूतावासमा यसबारेमा बुझ्नुपर्छ यद्यपी दूतावासले सधै सही जवाफ दिन्छन् भन्ने कुरामा पनि आश्वस्त हुन सकिन्न ।
७ यदि कसैले अमेरिकामा अपराध गरेको छ भने अपराधको मुद्दा पेन्डिंग अवस्थामा रहेपनि त्यस्ता व्यक्तिलाई कार्यकारी आदेशलाई देशनिकालाका लागि छिटो प्रकृयामा लैजान सक्छ ।
जुबो वासिंटन डिसीमा रहेर कानुन व्यवसायमा संलग्न छन् । उनका टिप्सहरु खसोखासका पाठकलाई पनि उपयुक्त हुने ठानेर यहाँ प्रस्तुत गरेका छौं ।
