अमेरिकी नागरिकता, ग्रिनकार्ड लगायतका लागि १० लाखको अनलाइन आवेदन
प्रकाशित मिति : बैशाख २१, २०७६ शनिबार
अमेरिकी सरकारको युएससीआईएसले अमेरिकी नागरिकता लगायतका कैयन आवेदन अनलाइनमार्फत नै दिनसकिने व्यवस्था गरेपछि १० लाखले अनलाइनमार्फत आवेदन दिएको युएससीआईएसले जनाएको छ । अमेरिकी नागरिकताको आवेदन, ग्रिनकार्डको रिप्लेसमेन्ट, नागरिकताको कागजात रिप्लेसमेन्ट, नागरिकताको प्रमाणपत्रको आवेदन लगायत विभिन्न ७ प्रकारका आवेदनहरु अनलाइनमार्फत दिनसकिने युएससीआईएसले व्यवस्था गरेको छ ।
आवेदकलाई सहज बनाउनका लागि अमेरिकी सरकारले अनलाइनमार्फत कैयन आवेदन फाइल गर्न सक्ने व्यवस्था गरेको हो । जसको प्रयोग आवेदकहरुले उल्लेख्यमात्रामा गरेको पाइएको छ । युएससीआईएसका प्रवक्ता जेसिका कोलिन्सका अनुशार अनलाइन आवेदन, सुचना प्राप्ती र आवेदनबारेको अपडेट कागजी आवेदनको तुलनामा धेरै सहज रहेको छ ।
यस्ता कैयन आवेदनबारे आवेदकले शुल्कसमेत क्रेडिटकार्डबाट अनलाइनमा नै तिर्न सक्ने व्यवस्था रहेको छ । अनलाइनबाट आवेदन दिंदा पत्रका कारण हुने ढिलाईको समस्या पनि धेरै कम भएको छ ।
अध्यागमन अधिकारीहरुको पनि समयको बचत हुने तथा कागजपत्र स्क्यान, स्टोर, शेयरमा लाग्ने समय र जनशक्तिको समेत बचत हुने भएकाले युएससीआईएसले यसलाई प्रभावकारी मानेको छ । अनलाइनबाट आवेदन दिनका लागि पहिले युएससीआईएसको वेवसाइटमा गएर एकाउन्ट बनाउन जरुरी हुन्छ ।