शरण दिने कार्यक्रम ४ महिना खारेज !
प्रकाशित मिति : माघ १२, २०७३ बुधबार
अमेरिकी राष्ट्रपति डोनाल्ड ट्रम्पले जारी गरेको कार्यकारी आदेशमा शरणार्थी कार्यक्रममा कडाई गर्ने उल्लेख छ । ४ महिनाका लागि विश्वका कुनैपनि देशका नागरिकलाई अमेरिका शरण दिने कार्यक्रम पूर्णतया रद्द गरिएको छ ।
कार्यकारी आदेशमा सिरिया जस्ता युद्धग्रस्त देशका नागरिकलाई शरणदिने काम तुरुन्तै बन्द गर्ने, शरणार्थी कार्यक्रम १२० दिनका लागि सस्पेण्ड गर्ने, त्यसपछि डिपोर्टमेन्ट अफ होमल्याण्ड सेक्युरिटी, स्टेट डिपार्टमेन्ट र डाइरेक्टर अफ नेशनल इन्टेलिजेन्सले संयुक्तरुपमा स्वीकृति प्रदान गरेका देशबाटमात्र शरणार्थी स्वीकार्ने उल्लेख छ ।
त्यस्तै सन् २०१७ मा १ लाख १० हजारलाई शरण प्रदान गर्ने ओबामाको योजना विपरित बढीमा ५० हजारलाईमात्र शरणप्रदान गर्ने जनाइएको छ । डिभिजन ओ, टाइटल २ अन्तरगत रहेका सातवटा देशहरुबाट आप्रवासी र गैरआप्रवासी दुबै प्रकारको आगमनमा ९० दिनका लागि लागि प्रतिबन्ध लगाइएको छ ।
त्यस्तै अमेरिकामा आउँदाजाँदा सबैलाई अनिवार्य औंठाछापको प्रणालीलाई दु्रत बनाउने र अमेरिकामा कुनै पनि प्रकारको भिसामा आउन चाहनेहरुलाई व्यक्तिपिच्छे अन्तरवार्ता लिनुपर्ने समेत कार्यकारी आदेशमा उल्लेख छ । भिसाका लागि अन्तरवार्ता दिनु नपर्ने वेभर कार्यक्रम अनिश्चितकालका लागि खारेज गरिएको छ ।
ट्रम्पको कार्यकारी आदेशलगत्तै अमेरिकाका विभिन्न विमानस्थलहरुमा इरान, इराक, लिबिया, सोमालिया, सुडान, सिरिया र यमनका नागरिकहरुलाई नियन्त्रणमा लिइएको छ । उनीहरुमध्ये केही अमेरिकामा ग्रिनकार्ड प्राप्त व्यक्तिहरुसमेत छन् । अमेरिकाको नागरिकता लिएका व्यक्तिले ती देशको समेत दोहोरो नागरिकता राखेको भएमा उनीहरुलाई पनि अमेरिका प्रवेशमा निगरानी गरिएको छ ।