जात, धर्म, पार्टी या कुनै समुह नभनी नेपाली भएर बस्न रक्षामन्त्रीको सुझाव
प्रकाशित मिति : चैत्र १८, २०७५ सोमबार
नेपाल सरकारका उपप्रधानमन्त्री तथा रक्षामन्त्री ईश्वर पोखरेलले बिदेशमा रहेका नेपालीहरुलाई नेपाली भएर बस्न सुझाव दिएका छन् । बिभिन्न जात, धर्म, पार्टी या कुनै समुहमा बिभाजित नभई नेपाली भएर बस्न सुझाव दिएका हुन् ।
प्रवासी नेपाली मञ्चले न्यूयोर्कमा आयोजना गरेको सम्मान तथा छलफल कार्यक्रमलाई सम्बोधन गर्दै रक्षामन्त्री पोखरेलले यहाँ रहेका नेपालीहरुलाई मिलेर बस्न भनेका छन् । उनले भने, मैले सुने यहाँ संगठित रुपमा बिभिन्न जातिका पनि फरक फरक समुह छन भन्ने, अनि पार्टी पार्टीमा बिभाजित भएको पनि देखियो, त्यसो नगर्नुस तपाईहरु नेपाली भएर बस्नुस ज्ञान, सिप, र पैसा आर्जन गर्नुस, सम्पन्न बन्नुस ।
आफ्नै जातिमा पनि पानी पोखरेल र दुध पोखरेल रहेको जनाउँदै, रक्षामन्त्री पोखरेलले बिदेशमा नेपालीहरु बिभाजित भएको तर्फ इंगित गर्दै भने तपाईहरु नेपाली भएर बस्नुस, देश बिकासमा सहकार्य गर्नुस । रक्षामन्त्री पोखरेलले यहाँ रहेका नेपालीहरुलाई देश बनेन भनेर गुनासो मात्रै नगरी निश्चित योजनाका साथ सरकारसंग हातेमालो गर्न आग्रह समेत गरेका छन् । उनले देश बिकासका लागि एउटा छातामा आउन आग्रह समेत गरे ।
दुई तिहाईको सरकारले समृद्ध नेपालको जग हालेको बचाउँ गर्दै उनले भने, अहिले हामीले जग हालेका छौं, यही सरकारले तपाई हाम्रो सपनाको महल बनाउँछ । लगानी सम्मेलन देखाउनका लागि नभई देश बिकासको आधार भएको जिकिर गरेका छन् ।
एक बर्षे कार्यकालको बचाउँ गर्दै मन्त्री पोखरेलले भने यो सरकार प्रणाली परिर्वतन हुँदा बनेको सरकार हो, स्थानिय देखी केन्द्र सम्म सरकार छ, त्यसका केही प्राविधिक कामहरु भएका छन्, हामीले तीन सय ३९ वटा काननुहरु परिमार्जन गरेका छौं । अब सरकारले जनताले देख्ने गरी योजना प्रस्तुत गर्छ । मन्त्री पोखरेल संयुक्त राष्ट्रसंघिय शान्ति मिसनको सम्मेलनलाई सम्बोधन गर्न बुधवार न्यूयोर्क आईपुगेका थिए ।