अमेरिकामा शरण खोज्न आएका १ हजार घर फर्किए, १ हजारले लिए मेक्सिकोमै वर्क परमिट
प्रकाशित मिति : फाल्गुन ७, २०७५ मंगलबार
मेक्सिकोहुँदै अमेरिका प्रवेश गर्ने पोर्ट अफ इन्ट्रीमा आएर शरण खोजिरहेका एकहजार आप्रवासीहरु आफ्नो घर फर्किएका छन् । सिमाक्षेत्रमा कुरेर अमेरिकामा शरण पाउने अवधि निकै लामो भएपछि उनीहरुले घर फर्कने निर्णय गरेका हुन् ।
एसाइलमको प्रकृया अगाडि बढाउनमा पोर्ट अफ इन्ट्रीमा निकै ढिलो गरिदा आप्रवासीहरुले महिनौं कुनुपर्ने बाध्यता आएको छ । जसका कारण एकहजार आप्रवासीहरुले मेक्सिको सरकारले स्वदेश फर्काउनका लागि राखेको प्रस्ताव स्वीकार गरेका छन् ।
अरु एकहजार आप्रवासीहरुले मेक्सिकोमा नै रहेर काम गर्नका लागि मेक्सिको सरकारका तर्फबाट प्रदान गरिएको वर्क परमिट स्वीकार गरेका छन् । झण्डै ६ हजार आप्रवासीहरु समुहमा यात्रा गरेर क्याराभानका रुपमा मेक्सिको र अमेरिकाको सिमाक्षेत्रमा आएका थिए ।
तर एसाइलमको प्रकृया अगाडि बढाउने क्रममा सिमाक्षेत्रमा कुर्दा असुरक्षा र अनिश्चितता बढेपछि उनीहरुले स्वदेश फर्कने वा मेक्सिकोमा नै काम गर्ने निर्णय लिएका हुन् । अमेरिकी सरकारले क्यालिफोर्नियाको सान यिसिद्रो पोर्ट अफ इन्ट्रीमा आउनेहरुलाइृ अदालती सुनुवाई सम्मका लागि मेक्सिकोमा नै फिर्ता पठाउने नीतिको कार्यान्वयन समेत सुरु गरिसकेको छ ।
बिहिबार ११ जना एसाइलम खोज्नेहरुका तर्फबाट अमेरिकन सिभिल लिबर्टी युनियन र अन्य दुई संस्थाका तर्फबाट ट्रम्प प्रशासनबिरुद्ध मुद्दा दायर गरिएको छ । अदालती सुनुवाईसम्म मेक्सिकोमा नै कुर्नुपर्ने नीति अमेरिका र अन्तर्राष्ट्रिय कानुनको उल्लंघन गर्ने दावी गर्दै मुद्दा दायर गरिएको हो । नर्दन डिस्ट्रिक्ट अफ क्यालिफोर्नियाको संघीय अदालतमा मुद्दा दायर गरिएको हो ।