महिलाको योनी छेदन प्रचलनबिरुद्ध युएससीआईएस, दोषीले अध्यागमन परिस्थीति झेल्नुपर्ने
प्रकाशित मिति : माघ २४, २०७५ बिहीबार
अमेरिकी सरकारका युएससीआईएस लगायतका विभिन्न सरकारी एजेन्सीहरु र अन्तर्राष्ट्रिय समुदायले महिलाको योनी छेदन प्रचलन अन्त्य गर्न माग गरेका छन् । फरबरी ६ लाई महिलाको योनी छेदन सम्बन्धि शुन्य सहनशिलता अन्तर्राष्ट्रिय दिवसका रुपमा मनाउने क्रममा यस्तो प्रचलन अन्त्यको माग गरिएको हो ।
अफ्रिका, एसिया र मध्यपूर्वका कतिपय देशहरुमा कतिपय समुदायहरुमा योनी छेदन सामान्य प्रकृयाका रुपमा लिने गरिन्छ । छोरीहरु जन्मेपछि किशोर अवस्थासम्म पुग्ने बेलामा परम्परागत ब्लेडको प्रयोग गरेर योनीको केही भाग काट्ने एकप्रकारको परम्परा कायम रहेको छ ।
युनिसेफका अनुशार अहिले जिवित रहेका २७ अफ्रिकी देशहरुसहित इन्डोनेशिया, इराकी कुर्दिस्तान र यमनका २ सय मिलियन महिलाहरुले यो प्रकृया पूरा गरेका छन् । अधिकांशको पाँचबर्ष उमेर पुग्नुभन्दा अगाडि नै ब्लेडको प्रयोग गरेर योनीको केहीभाग काटिन्छ ।
कुनै पनि स्वास्थ्यको कारण विना यसरी योनीको भाग काट्नु मानव अधिकारको हनन भएको युएससीआईएसले जनाएको छ । अमेरिकामा पनि झण्डै ५ लाख केटीहरु यो प्रकृयाको जोखिममा रहेको जनाइएको छ । अमेरिकामा पनि यस्तो काम भइरहेको र संघीय कानुन अनुशार यो अपराध रहेको युएससीआईएसको भनाई छ ।
बालिकाहरुको योनीको भाग काट्ने काम गरिएमा यो बाल दुब्र्यबहार हुने र त्यस्तो अपराध गर्नेहरुले जेलको सामना गर्ने युएससीआईएसले जनाएको छ । यदि कसैले त्यस्तो काम गरेमा अध्यागमन परिस्थीति झेल्नुपर्ने युएससीआईएसले चेतावनी दिएको छ ।