अमेरिकाको नक्कली विश्वविद्यालयमा भर्ना हुने १२९ भारतीय विद्यार्थी पक्राउ
प्रकाशित मिति : माघ २१, २०७५ सोमबार
अमेरिकामा सरकारले स्थापना गरेको नक्कली विश्वविद्यालयमा भर्ना भएका कारण पक्राउ पर्नेहरुमध्ये १२९ जना भारतीय विद्यार्थीहरु रहेका छन् । सरकारले अमेरिकामा विद्यार्थी भिसामा आएर भिसा जोगाउनमात्र विश्वविद्यालय भर्ना हुनेहरुलाई निशानामा राखेर नक्कली विश्वविद्यालय नै खोलेको थियो ।
शुल्क तिरेर पढ्न जानु नपर्ने तर भिसा अद्यावधिक हुने सुविधा सहित अमेरिकी सरकारले अध्यागमन अपरेशनका दौरान नक्कली विश्वविद्यालय स्थापना गरेको थियो । मिसिगनमा फार्मिंटन युनिभर्सिटीका नाममा खोलिएको उक्त नक्कली विश्वविद्यालय बन्द गरिसकिएको छ ।
युनिभर्सिटी अफ फार्मिङटनका नामबाट खोलिएको वेवसाइटमा विद्यार्थीहरु अध्ययन गर्दै गरेका तस्वीरहरु राखिएको थियो । झट्ट हेर्दा युनिभर्सिटी नक्कली हो भनेर पत्याउन मुस्किल हुन्छ । अण्डर ग्रयाजुएटका लागि बार्षिक ट्युशन शुल्क साढे ८ हजार डलर र ग्रयाजुएटका लागि ११ हजार डलर तोकेर वेवसाइटमा प्रचार समेत गरिएको थियो ।
बिहिबार बन्द गर्नु अगाडि युनिभर्सिटीको वेवसाइट यस्तो थियो ।
तर यो युनिभर्सिटीमा कुनै कक्षा संचालन पनि हुने गरेको थिएन भने कुनै शिक्षक वा प्राध्यापक समेत नियुक्त गरिएको थिएन । क्याम्पसको नामको एउटा सानो कोठामात्र रहेको थियो । यो अमेरिकी सरकारका अण्डरकभर एजेन्टहरुले भिसाको दुरुपयोग गर्ने विदेशी विद्यार्थीहरुलाई फन्दामा पार्न स्थापना गरेका थिए । विद्यार्थी भिसा जोगाउन कलेजमा भर्ना हुने तर अध्ययन नगरी काम गर्दै अमेरिकामा बस्नेहरुलाई फन्दामा पार्न यस्तो नक्कली युनिभर्सिटी स्थापना गरिएको थियो ।
सुरुमा विद्यार्थी भिसामा अमेरिका आउने र पछि अमेरिकामा बस्न र काम गर्नका विद्यार्थी भिसा अद्यावधिक राख्नका लागि सस्ता युनिभर्सिटी खोज्ने विद्यार्थीहरुलाई फन्दामा पार्न आइसले यस्तो उपाय अपनाएको हो । बुधबार उक्त युनिभर्सिटीमा भर्ना भएका दर्जनौं विद्यार्थीहरुलाई आइसले पक्राउ गरेको छ । सम्भवत उनीहरुले अब देशनिकालाको सामना गर्नेछन् ।
अहिले युनभर्सिटीको वेवसाइट खोल्दा यस्तो देखिन्छ ।
अहिले उक्त युनिभर्सिटीको वेवसाइटमा आइसले युनिभर्सिटी बन्द गराएको उल्लेख गरिएको छ । युनिभर्सिटी बन्द हुँदा प्रभावित भएका विद्यार्थीहरुलाई आइसमा सम्पर्क गर्न समेत सुझाव दिइएको छ ।
त्यस्तै आइसले कम्तीमा ६ सय विद्यार्थीहरुलाई विद्यार्थी भिसाको दुरुपयोग गरेर अमेरिकामा नै बस्न सघाउने ८ जनालाई पनि नियन्त्रणमा लिएको छ । यो अपरेशनका कारण कतिजना विद्यार्थीहरुले देशनिकालाको सामना गर्दैछन् भन्ने बारे आइसले केही पनि बताएको छैन ।
भिसा दुरुपयोग गर्ने विद्यार्थीलाई फसाउन अमेरिकी सरकारको गृहमन्त्रालयको वेवसाइटमा नै उक्त युनभर्सिटीलाई आधिकारिक युनभर्सिटीको सुचीमा राखिएको थियो ।
अन्तर्राष्ट्रिय विद्यार्थीहरुले पढ्न सक्ने भन्दै अमेरिकामा रहेका डिपार्टमेन्ट अफ होमल्याण्ड सेक्युरिटीले राखेका शिक्षण संस्थाहरुको सुचीमा युनिभर्सिटी अफ फार्मिङटनलाई पनि सुचिकृत गरिएको छ । उक्त नक्कली युनिभर्सिटीको फेसबुक र ट्वीटर पेज समेत बनाइएको थियो । जुन बुधबार डिलिट गरिसकिएको छ ।