सरकार शटडाउनका कारण स्थगित अध्यागमन मुद्दाको संख्या ६७ हजार नाघ्यो, एकसय बढी नेपाली
डिसेम्बर २२ देखि जारी अमेरिकी सरकार शटडाउनका कारण अमेरिकी अध्यागमन अदालतमा सुनुवाई तय भएका ६७ हजार भन्दा धेरै अध्यागमनबारेका मुद्दाहरुको सुनुवाई स्थगित भएको छ । ती मुद्दाहरुको नयाँ सुनुवाई मिति २ बर्ष वा त्यो भन्दा बढी समय पछि सर्न सक्ने जनाइएको छ । सुनुवाई स्थगित भएका अधिकांश मुद्दाहरु एसाइलमका मुद्दाहरु रहेका छन् ।
अमेरिकाको इतिहासमा नै सबैभन्दा लामो शटडाउनका कारण बिहिबारसम्म सम्म ६७ हजार ४ सय २७ मुद्दाहरु अध्यागमन मुद्दाहरुको सुनुवाई स्थगित भइसकेको छ । हरेक साता शटडाउन बढ्दैजाँदा प्रभावित हुने मुद्दाको संख्या २० हजारका दरले बढ्दै जाने ट्रान्जेक्सनल रेकर्ड एक्सेस क्लीयरिंगहाउसको तथ्यांकले देखाएको छ । शटडाउन जनवरीको अन्त्यसम्म पनि कायम भएमा कम्तीमा १ लाख अध्यागमनका मुद्दाहरु स्थगित हुने देखिएको छ ।
शटडाउन कायम रहदै गर्दा अमेरिकी अध्यागमन अदालतमा ब्याकलग पनि क्रमश बढ्दै गएको छ । नोभेम्बरको अन्त्यसम्म अमेरिकी अध्यागमन अदालतमा ८ लाख ९ हजार ४१ केसको ब्याकलग कायम रहेकोमा शटडाउनका कारण ब्याकलग अझ थपिएको छ । दुईदेखि ४ बर्ष कुरेर अदालतको सुनुवाई मिति पाएकाहरुले शटडाउन अन्त्यभएपछि फेरी दुईदेखि ४ बर्षपछिको नयाँ मिति पाउनेछन् ।
जनवरी २५ सम्म शटडाउन कायम रहेमा ८६ हजार १ सय ९२ मुद्दाहरु स्थगित हुनेछन् । फरबरी १ सम्म शटडाउन कायम रहेमा १ लाख ८ हजार १ सय १२ अध्यागमन मुद्दाहरु स्थगित हुनेछन् ।
नेपालीका कति ?
डिसेम्बर २२ देखि जारी अमेरिकी सरकार शटडाउनका कारण हरेकदिन ४ देखि ७ जना नेपालीका एसाइलमका मुद्दाहरु स्थगित भएका छन् । अहिलेसम्म एकसय भन्दा धेरै नेपालीका एसाइलमका मुद्दाहरु स्थगित भएको तथ्यांकले देखाएको छ ।
सरकार शटडाउनका कारण थुनामा राखिएका बाहेक अन्यका अध्यागमन मुद्दाहरुको सुनुवाई स्थगित भएको छ । अमेरिकी अध्यागमन अदालतमा हरेक महिना एकसयको हाराहारीमा नेपालीका एसाइलमका मुद्दाको सुनुवाई हुने गरेको छ । गत नोभेम्बरमा मात्र ९६ जना नेपालीका एसाइलमका मुद्दाको सुनुवाई गरिएको थियो भने अक्टोबरमा १ सय ५ जना नेपालीका अध्यागमन मुद्दाको सुनुवाई गरिएको थियो ।
