सरकार शटडाउनले न्युयोर्कको अध्यागमन अदालतमा ५३२० एसाइलम मुद्दाको सुनुवाई स्थगित
प्रकाशित मिति : माघ २, २०७५ बुधबार
डिसेम्बर २२ देखि जारी अमेरिकी सरकार शटडाउनका कारण न्युयोर्कको अध्यागमन अदालतमा सुनुवाई तय भएका ५३२० मुद्दाको सुनुवाई स्थगित भएको छ । अमेरिकाभर भने ४२ हजार भन्दा धेरै अध्यागमनबारेका मुद्दाहरुको सुनुवाई स्थगित भएको छ । ती मुद्दाहरुको नयाँ सुनुवाई मिति २ बर्ष वा त्यो भन्दा बढी समय पछि सर्न सक्ने जनाइएको छ । सुनुवाई स्थगित भएका अधिकांश मुद्दाहरु एसाइलमका मुद्दाहरु रहेका छन् ।
अमेरिकाका अध्यागमन अदालतहरुमध्ये क्यालिफोर्नियाको अदालतमा ९४२४, टेक्सासमा ५१४१, फ्लोरिडामा ४२३२, न्युजर्सीमा १८९४, मासाचुसेट्समा १८०५, भर्जिनियामा १७९१, मेरिल्याण्डमा १३६७ अध्यागमन मुद्दाको सुनुवाई स्थगित भएको छ ।
जनवरी १८ सम्म शटडाउन कायम रहेमा ६७ हजार ४ सय २७ मुद्दाहरु स्थगित हुनेछन् भने जनवरी २५ सम्म शटडाउन कायम रहेमा ८६ हजार १ सय ९२ मुद्दाहरु स्थगित हुनेछन् । फरबरी १ सम्म शटडाउन कायम रहेमा १ लाख ८ हजार १ सय १२ अध्यागमन मुद्दाहरु स्थगित हुनेछन् ।