न्युयोर्कमा कागजपत्रविहिनलाई ड्राइभर लाइसेन्स दिलाउने अभियान सुरु गरिदै, १ मिलियन खर्च गरिने
प्रकाशित मिति : १ माघ २०७५, मंगलबार
न्युयोर्क राज्यमा रहेका कागजपत्रविहिनहरुलाई ड्राइभर लाइसेन्स दिलाउने अभियानको सुरुवात गरिने भएको छ । द न्युयोर्क इमिग्रेशन कोलिएसनले सुरु गर्ने उक्त अभियानका क्रममा १ मिलियन अमेरिकी डलर खर्च गरिने भएको छ ।
राज्यका निर्वाचित प्रतिनिधिहरुलाई दवाव दिने उद्देश्यले यस्तो अभियानको थालनी गर्न लागिएको हो । उक्त अभियान केही दिनमा नै सुरु गरिने जनाइएको छ ।
हालसम्म अमेरिकाका १२ वटा राज्यमा सोसल सेक्युरिटी विना नै ड्राइभर लाइसेन्स प्रदान गरिदै आएको छ । क्यालिफोर्निया, कनेक्टिकट, इलिनोय, मेरिल्याण्ड, युटाह लगायतका राज्यमा कागपत्रविहिनहरुले समेत ड्राइभर लाइसेन्स प्राप्त गर्न सक्छन् ।
सन् २००७ मा न्युयोर्कका तत्कालिन गभर्नरले कागजपत्रविहिनहरुलाई समेत ड्राइभर लाइसेन्स प्रदान गर्नका लागि कार्यकारी आदेश जारी गरेका थिए । तर पछि यो आदेश कार्यान्वयन भने हुन सकेन ।
न्युयोर्क राज्यमा कागपत्रविहिनहरुलाई ड्राइभर लाइसेन्स प्रदान गरिएको खण्डमा २ लाख ६५ हजार व्यक्ति लाभान्वीत हुनसक्ने अनुमान गरिएको छ ।