यी हुन् अमेरिकी सरकार शटडाउनका कारण एसाइलम स्थगित हुने नेपाली
अध्यागमन अदालत
अमेरिकी सरकार शटडाउनका कारण ४२ हजार अध्यागमन सुनुवाई स्थगितहुँदा प्रभावित हुने नेपालीहरुको संख्या पनि उल्लेख्य रहेको छ । डिसेम्बर २२ देखि जारी अमेरिकी सरकार शटडाउनका कारण हरेकदिन ४ देखि ७ जना नेपालीका एसाइलमका मुद्दाहरु स्थगित भएका छन् ।
क्रिशमस, नयाँ बर्ष, सप्ताहन्त लगायतका विदाहरुबाहेक यो अवधिमा अमेरिकी अध्यागमन अदालत झण्डै १४ दिन खुल्नुपर्नेमा यी दिनहरुमा तय भएका अदालती सुनुवाईहरु सरकार शटडाउनका कारण स्थगित भएका छन् । अहिलेसम्म ७० भन्दा धेरै नेपालीका एसाइलमका मुद्दाहरु स्थगित भएको तथ्यांकले देखाएको छ ।
सरकार शटडाउनका कारण थुनामा राखिएका बाहेक अन्यका अध्यागमन मुद्दाहरुको सुनुवाई स्थगित भएको छ । यी मुद्दाहरुको सुनुवाई अब कम्तीमा २ बर्षदेखि ४ बर्षसम्म पछि धकेलिने भएको छ । शटडाउन अन्त्य भएपछि स्थगित भएका मुद्दाहरुका लागि नयाँ सुनुवाई मिति प्रदान गरिनेछ ।
अमेरिकी अध्यागमन अदालतमा हरेक महिना एकसयको हाराहारीमा नेपालीका एसाइलमका मुद्दाको सुनुवाई हुने गरेको छ । गत नोभेम्बरमा मात्र ९६ जना नेपालीका एसाइलमका मुद्दाको सुनुवाई गरिएको थियो भने अक्टोबरमा १ सय ५ जना नेपालीका अध्यागमन मुद्दाको सुनुवाई गरिएको थियो ।
अमेरिकाको इतिहासमा नै सबैभन्दा लामो शटडाउनका कारण जनवरी ११ सम्म विश्वभरका नागरिकका ४२ हजार ७ सय ४६ वटा अध्यागमन मुद्दाहरुको सुनुवाई स्थगित भइसकेको छ । हरेक साता शटडाउन बढ्दैजाँदा प्रभावित हुने मुद्दाको संख्या २० हजारका दरले बढ्दै जाने ट्रान्जेक्सनल रेकर्ड एक्सेस क्लीयरिंगहाउसको तथ्यांकले देखाएको छ । शटडाउन जनवरीको अन्त्यसम्म पनि कायम भएमा कम्तीमा १ लाख अध्यागमनका मुद्दाहरु स्थगित हुने देखिएको छ ।
शटडाउन कायम रहदै गर्दा अमेरिकी अध्यागमन अदालतमा ब्याकलग पनि क्रमश बढ्दै गएको छ । नोभेम्बरको अन्त्यसम्म अमेरिकी अध्यागमन अदालतमा ८ लाख ९ हजार ४१ केसको ब्याकलग कायम रहेकोमा शटडाउनका कारण ब्याकलग अझ थपिएको छ । दुईदेखि ४ बर्ष कुरेर अदालतको सुनुवाई मिति पाएकाहरुले शटडाउन अन्त्यभएपछि फेरी दुईदेखि ४ बर्षपछिको नयाँ मिति पाउनेछन् ।
अमेरिकाका अध्यागमन अदालतहरुमध्ये क्यालिफोर्नियाको अदालतमा जनवरी ११ सम्म शटडाउनका कारण ९ हजार ४ सय २४ केसको सुनुवाई स्थगित भएको छ । त्यस्तै न्युयोर्कको अदालतमामात्र ५३२० अध्यागमन मुद्दाको सुनुवाई स्थगित भएको छ । टेक्सासमा ५१४१, फ्लोरिडामा ४२३२, न्युजर्सीमा १८९४, मासाचुसेट्समा १८०५, भर्जिनियामा १७९१, मेरिल्याण्डमा १३६७ अध्यागमन मुद्दाको सुनुवाई स्थगित भएको छ ।
जनवरी १८ सम्म शटडाउन कायम रहेमा ६७ हजार ४ सय २७ मुद्दाहरु स्थगित हुनेछन् भने जनवरी २५ सम्म शटडाउन कायम रहेमा ८६ हजार १ सय ९२ मुद्दाहरु स्थगित हुनेछन् । फरबरी १ सम्म शटडाउन कायम रहेमा १ लाख ८ हजार १ सय १२ अध्यागमन मुद्दाहरु स्थगित हुनेछन् ।
