अमेरिकामा कागजपत्रविहिनबाट सरकारलाई बर्षेनी २० बिलियन डलर भन्दा धेरै कर
प्रकाशित मिति : पुस २५, २०७५ बुधबार
अमेरिकामा कागजपत्रविहिन आप्रवासीहरुले बर्षमा २० बिलियन डलर भन्दा धेरै कर तिर्ने गरेको आईआरएसको तथ्यांकले देखाएको छ । सिमाक्षेत्रबाट प्रवेश गरेका लाखौं कागजपत्रविहिनहरुले अमेरिकी नागरिक सरह नै कर तिर्ने गरेको पाइएको छ ।
सन् २०१५ को आईआरएसको तथ्यांक अनुशार उक्त बर्ष अमेरिकामा सोसल सेक्युरिटी नम्बर समेत नभएका कागजपत्रविहिन आप्रवासीबाट सरकारलाई ४ दशमलव ४ मिलियन डलर करबापत प्राप्त भएको थियो । परिणामस्वरुप कागजपत्रविहिन कामदारहरुले एकबर्षमा २३ बिलियन डलर कर तिरेका थिए ।
तर यसरी कर तिरिरहेका कागजपत्रविहिनहरुले रिटायर्ड हुँदासम्म अमेरिकामा बसेपनि पछि सोसल सेक्युरिटी सुविधा समेत प्राप्त गर्न सक्दैनन् । त्यो बाहेक उनीहरुलाई मेडिकेयर लगायतका सुविधाहरु पनि प्राप्त हुँदैनन् ।
कागजपत्रविहिनहरु पनि अमेरिकामा कर तिर्नका लागि व्यक्तिगत करदाता परिचय नम्बर प्राप्त गर्न योग्य हुन्छन् । कानुनी रुपमा काम गर्न योग्य नभएकाहरुबाट समेत कर असुल्न आईआरएसले सन् १९९६ देखि यस्तो व्यवस्था गरेको हो ।
आईआरएसले यसरी करदाता परिचय नम्बर प्राप्त गरेर कर तिर्दै आएका कागजपत्रविहिनहरुको विवरण भने अमेरिकी सरकारको अध्यागमन निकायहरुलाई प्रदान गर्दैन । जसका कारण कागजत्रपविहिनहरुले पनि सुरक्षित तरिकाले सरकारलाई कर तिर्दै आएका छन् ।