प्रहरीको गोलीबाट अमेरिकामा मारिए नेपाली, किन हान्यो प्रहरीले गोली ?
प्रकाशित मिति : भाद्र ११, २०७५ सोमबार
अमेरिकाको कोलोराडो वेष्टमिनिस्टरमा प्रहरीको गोलीबाट नेपाली युवाको मृत्यु भएको छ । मारिनेमा कोलोराडो निवासी २५ बर्षीय बिरेन्द्र ठकुरी रहेका छन् ।
कोलोराडोको रान्च रिजर्भ पार्कवे र फेडेरल बोलुभर्डमा शनिबार बेलुका भएको घटनामा प्रहरीले नेपाली युवामाथि गोली हानेको हो । सडकको छेउमा केही व्यक्तिहरु झगडा गरिरहेको खबर पाएपछि बेलुका पौने ९ बजेतिर त्यहाँ प्रहरी पुगेको थियो ।
प्रहरी पुग्दा सडकको छेउमा केही व्यक्तिहरु रहेका थिए । प्रहरी आएपछि मृतक ठकुरी र उनका दाजु प्रहरी भएतिर अगाडि बढेका थिए । दुईजना व्यक्ति आफूतिर अगाडि बढेको र उनीहरुले आदेशको पालना नगरेको भन्दै प्रहरीले गोली चलाएको थियो ।
गोली लागेका बिरेन्द्र ठकुरीलाई अस्पतालमा मृत घोषणा गरिएको थियो भने उनका दाजुलाई प्रहरीले हिराशतमा लिएको थियो । तर उनलाई राती अबेर प्रहरीले रिहा गरेको थियो ।
प्रहरीले गोली हान्ने अधिकारीको नाम भने सार्वजनिक गरेको छैन । घटनाबारे अनुसन्धान भइरहेको जनाइएको छ ।