अविरल वर्षाले तराईमा डुबान र पहाडमा पहिरो खस्दा देशैभरि जनजीवन अस्तव्यस्त
प्रकाशित मिति : असार १८, २०७५ सोमबार
अविरल वर्षाले तराईमा डुबान र पहाडमा पहिरो खस्दा देशैभरि जनजीवन अस्तव्यस्त बनेको छ । बर्षाकै कारण कारण आएको बाढीले बगाउँदा बाँकेमा दुई जनाको ज्यान गएको छ भने घर भत्किँदा रोल्पामा तीन र कैलालीमा एक जनाको ज्यान गएको छ ।
जिल्ला प्रहरी कार्यालय कोहलपुरका अनुसार जेठी नालामा आएको बाढीले बैजनाथ गाउँपालिका–३ का ६५ वर्षिय तुला बुढा र सोही गाउँपालिका–५ का ३५ वर्षिय लोकबहादुर सुनारलाई बगाएको छ । उता, जिल्ला प्रहरी कार्यालय रोल्पाका अनुसार रुन्टीगढी गाउँपालिका–५ सैवाङ गाउँमा घर भत्किएर तीन जनाको मृत्यु भएको हो । यस्तै, कैलालीको गोदावरी नगरपालिका–९ धनचौरीका कडेरा रानाको घर भत्किँदा उनकी श्रीमती दुठा रानाको मृत्यु भएको छ ।
उता, अविरल बर्षाका कारण वीरगञ्जको श्रीपुर, पानीट्यांकी, नगवा, रामगढवा लगायत क्षेत्र डुबानमा परेको छ । वीरगञ्जको आदर्शनगर, कृष्ण अस्पताल, नारायणी अस्पताल आसपासका क्षेत्रमा समेत पानीको निकास रोकिएका कारण सर्वसाधारणले सास्ती ब्यहोरेका छन् । वर्षाको पानी नालाबाट राम्रोसँग निकास नभएपछि कतिपयको घर तथा पसलमा पनि पानी पसेको छ । यस्तै, बाँकेको नेपालगञ्ज पनि डुबानमा परेको छ । न्यूरोड, सेतु विक चोक, वीरेन्द्र चोक लगायत क्षेत्र जलमग्न छन् ।
नेपालगञ्ज उप–महानगरपालिकाका बेलासपुर, धम्बोझी, घरबारीटोल, फुल्टेक्रा, बसपार्क, भृकुटीनगर र बाँके गाउँमा समेत डुबान भएको छ । यसैगरी सिरहा मिर्चैयाको केन्द्रबिन्दु मानिने थाना चोक, बजार क्षेत्र र कटारी चोकलगायतका स्थानमा पानी जमेकाले आवत–जावतमा समस्या भएको छ । वर्षाका कारण दाङको जनजिवन प्रभावित भएको छ ।
बाढीका कारण तुलसीपुर– घोराही– लमही सडक खण्डमा पर्ने खहर खोलाहरुमा पानीको बहाव बढेपछि साना खालका सवारी साधन सञ्चालनमा समस्या भएको छ । बर्दियामा डुबानमा परी केही परिवार विस्थापित भएको खबर आए पनि संख्या एकिन नभएको स्थानीय प्रशासनले जनाएको छ ।