चिनियाँ परियोजना कार्यान्वयनका लागि संयन्त्र बनाउने मन्त्रिपरिषद्को निर्णय
प्रकाशित मिति : असार ३, २०७५ आईतबार
मन्त्रिपरिषद्को बैठकले चीनको सहयोग नेपालमा सञ्चालन भैरहेको परियोजना कार्यान्वयनका लागि दुवै देश सम्मिलित संयन्त्र बनाउने निर्णय गरेको छ।
आइतबार बिहान बसेको मन्त्रिपरिषदको बैठकले परियोजनाको कार्यान्नयनका लागि सम्यन्त्र बनाउन लागेको सूचना तथा सञ्चार मन्त्री गोकुल बास्कोटाले जानकारी दिए। प्रधानमन्त्री केपी शर्मा ओलीको आसन्न चीन भ्रमणलाई मध्यनजर गरेर सरकारले यस्तो निर्णय गरेको हो।
संयन्त्र निर्माणका लागि छलफल अगाडि बढीसकेको र छिट्टै नेपालको परराष्ट्र मन्त्रालय र चीनको विदेश मन्त्रालयबीच यसबारेमा समझदारी हुने मन्त्री बाँस्कोटाले जानकारी दिए।
बैठकले दुई देशबीच हुने सहयोगसम्बन्धी कार्यक्रम कार्यान्वयनमा सहजीकरण लागि संयन्त्र स्थापना गर्ने समझदारी पत्र निर्माण र हस्तान्तरणका लागि परराष्ट्र मन्त्रालयलाई स्वीकृति समेत दिएको छ।
त्यस्तै बैठकले खानेपानी बोर्ड सदस्यको संख्या १९ बाट घटाएर १० कायम गर्ने निर्णय गरेको सञ्चारमन्त्री बाँस्कोटाले जानकारी दिए। त्यसैगरी बैठकले लेखापरीक्षण विधेयक संघीय संसदमा पेश गर्न स्वीकृति दिने, सूचना प्रविधि तथा सार्वजनिक सञ्चारसम्बधी नयाँ विधेयक तर्जुमा गर्न सैद्धान्तिक सहमति दिने निर्णय समेत बैठकले गरेको छ।
बैठकले शिक्षा, विज्ञान तथा प्रविधि मन्त्रालय, वाणिज्य तथा आपूर्ति मन्त्रालय र राजस्व अनुसन्धान विभागको संगठन संरचना स्वीकृत गर्ने निर्णय गर्नुका साथै उच्च सरकारी वकिलको कार्यालय ओखलढुंगा र वीरगन्जको दरबन्दी स्वीकृत समेत गरेको छ।