Follow @khasokhasmag

मुखर्जीलाई मधेसवादी दलको गुहार- संविधानमा त्रुटि छ, सच्याउन संघर्षरत छौं


प्रकाशित मिति : कार्तिक १९, २०७३ शुक्रबार

नेपालको संविधानमा त्रुटि रहेकाले त्यसलाई सच्याउनका लागि लामो सङ्घर्ष गर्नुपरिरहेको जानकारी भारतीय राष्ट‍्रपति प्रणव मुखर्जीलाई सङ्घीय लोकतान्त्रिक मधेसी मोर्चासँग आबद्ध मधेसवादी दलका नेताहरुले गराएका छन् । नेपालको तीनदिने राजकीय भ्रमणमा रहेका मुखर्जीलाई बिहीवार साँझ होटल ह्यातमा सामूहिक भेट गर्दै मधेसवादी दलहरुले संविधानको त्रुटि सच्याएरै छाड्ने बताएका हुन् ।

भेटका अवसरमा मधेसवादी दलका नेताहरुले दुई देशबीचको सम्बन्ध, मधेसवादी दलको चासोका साथै नेपालको संविधानमा देखिएको त्रुटिलाई सच्याउन गर्दै आएको आन्दोलनबारेमा मुखर्जीलाई जानकारी गराएका थिए । भेटपछि नेपाल सद्भावना पार्टीका अध्यक्ष राजेन्द्र महतोले नेपालको संविधान त्रुटिपूर्ण भएकाले त्यसलाई पूर्णता दिन आफूहरु लागिपरेको जानकारी भारतीय राष्ट्रपतिलाई गराएको सञ्चारकर्मीलाई बताए । उनले नेपालको संविधानमा भएका कमीकमजोरीलाई सच्याउन लामो सङ्घर्ष गर्नुपरेको जानकारी पनि गराएको बताए ।

मुखर्जीसँगको सामूहि भेटका लागि तराई–मधेस लोकतान्त्रिक पार्टीका अध्यक्ष महन्थ ठाकुर, सङ्घीय समाजवादी फोरम नेपालका अध्यक्ष उपेन्द्र यादव, सङ्घीय समाजवादी पार्टीका अध्यक्ष शरदसिंह भण्डारी, मधेसी जनाधिकार फोरम गणतान्त्रिकका अध्यक्ष राजकिशोर यादव र सङ्घीय सद्भावना पार्टीका अध्यक्ष अनिलकुमार झालगायतका नेताहरु पुगेका थिए ।

गच्छदारले मुखर्जीलाई एक्लै भेटे

यसैबीच, मधेसी जनअधिकार फोरम (लोकतान्त्रिक) का अध्यक्ष विजयकुमार गच्छदारले पनि राष्ट्रपति मुखर्जीसँग सोही होटलमा विहीबार साँझ शिष्टाचार भेट गरेका कारोबारमा खबर छ । भेटका अवसरमा राष्ट्रपति मुखर्जीको भ्रमणबाट नेपाल र भारतबीचको सम्बन्ध अझ सुदृढ होस् भनी आफूले शुभकामना व्यक्त गरेको गच्छदारले बताए ।

‘विगतमा नेपाल र भारतबीच देखिएको चिसोपना यो भ्रमणबाट मेटिनेछन् भन्ने कुरा बताएँ,’ गच्छदारले भने । राष्ट्रपति मुखर्जीले नेपालमा देखिएको राजनीतिलगायतका सबै समस्या सहमतिका आधारमा मिलेर समाधानका लागि शुभकामना दिएका उनले बताए । सोही स्थानमा नेपाल परिवार दलका सांसद मिलन राजवंशीलगायतको टोलीले समेत राष्ट्रपति मुखर्जीसँग भेटघाट गरेको थियो ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com