पर्यटक बोक्ने गाडीमा ‘साडी–कुर्ता’ तस्करी, नागढुंगाबाट ३० लाखको कपडा बरामद
प्रकाशित मिति : चैत्र २२, २०७४ बिहीबार
भारतको नयाँदिल्लीबाट नेपालगञ्ज हुँदै काठमाडौं आएको पर्यटक बोक्ने गाडीमा ३० लाख मूल्य बराबरको भन्सार छलेको साडी र कुर्ता फेला परेको छ । बिहीबार पत्रकार सम्मेलन गरेर काठमाडौं प्रहरी प्रमुख (एसएसपी) विश्वराज पोखरेलले विशेष सूचनाका आधारमा ठुलो परिणाममा भन्सार छलेर ल्याएको कुर्ता र साडी बरामद गरिएको जानकारी दिएका छन् ।
बुधवार मध्यान्ह ३ बजे महानगरीय प्रहरी प्रभाग नागढुंगाका इन्सपेक्टर केशव भट्ट कमाण्डको प्रहरी टोलीले ना. ६ ख. ६३०२ नम्बरको गाडी सहित अवैध कपडा नियन्त्रणमा लिएको थियो ।
कालो नम्बर प्लेटको गाडीमा पर्यटक लेखेर विभीन्न साईजका फल्स बटनमा लुकाएर काठमाडौं आएको साडी–कुर्ता र गाडीलाई आवश्यक कारवाहीका लागि राजस्व अनुसन्धान विभाग पठाईने एसएसपी पोखरेलले जानकारी दिए ।
रिलायन्स लोटस फाइनान्सको लगानी रहेको उक्त गाडीको स्वामित्व माधव गौतम हुँदै ‘मिलन’ भन्ने रमेश खड्काको नाममा नामसारी भएको प्रहरी अनुसन्धानबाट खुलेको छ ।
प्रहरीले उक्त गाडीका चालक नियन्त्रणमा लिएपनी गाडी धनी रमेश खड्का भने भाग्न सफल भएका छन् । चालकको प्रराम्भिक बयानमा गाडी धनी रमेश खड्का ‘प्रहरी मिलाउँछु’ भन्दै नागढुंगा भन्दा केही मिटर अगाडी ओर्लिएका थिए ।
नेपालगञ्जबाट आफैं गाडी हाँकेर आएका खड्का गाडीलाई प्रहरीले नियन्त्रणमा लिएपछि सम्पर्क विहीन भएको र उनको खोजी कार्य जारी रहेको काठमाडौं प्रहरीले जनाएकोे छ ।
भारतको नयाँ दिल्लीबाट चैत्र २० गते काठमाडौंका लागी छुटेको उक्त गाडीले प्रहरी र भन्सारका कर्मचारीलाई झुक्याउनका लागी कालो प्लेटको सार्वजनिक सवारीलाई पर्यटक प्रिन्ट गरेको बताइएको छ । लामो समयदेखि तस्करीकै लागि प्रयोग हुने उक्त गाडीमा जम्मा १५ जना यात्रु काठमाडौं आएका थिए ।
Source : Ratopati