Follow @khasokhasmag

दसैँको मुखमा आफन्त छोड्नु पर्दाको पीडा


प्रकाशित मिति : आश्विन २१, २०७३ शुक्रबार

‘नजिकिएको दसैँ नमनाइकन विदेशिन कसलाई मन लाग्छ र ! बाध्य भएर हिँडेको’ यो भनिरहँदा नवलपरासीका नवराज पाण्डेको आँखा रसाइरहेका थिए र अनुहार निकै मलिन देखिन्थ्यो । रोजगारीका लागि कतार जान लागेका पाण्डेले भने – ‘छ महिना पहिले विदेश जानका लागि तयारी गरेको हुँ आज भोलिभन्दा भन्दै दसैँमा आएर मात्रै भिसा र टिकट भयो, के गर्ने नजाऊँ भन्ने पनि भएन, घर बनाउँदा र विवाह गर्दा लागेको ऋण कसरी तिर्ने ?’

उनी मात्रै होइन, घरपरिवारसँग दशैं मनाएर रमाउने बेलामा पसिना बगाउन साउदी अरब जानुपर्दा म्याग्दीका कैलाश विकलाई कम्ती पीडा भएको छैन तर के गर्नु विकल्प केही भेटिएन । ‘चाडवाडको मुखमा जन्मथलो र आफन्त छाडेर परदेश जान मन त कहाँ थियो र आमा बिरामी हुँदा लागेको ऋण तिर्न जान लागेको हो, अध्यारो अनुहार पारेर उनले भने , ‘अब यता केही गरे पनि जागिर भेटिँदैन, चार/पाँच वर्ष उता पसिना बगायो भने त ऋण तिर्न सकिएला र केही बचाउन सकियो भने व्यापार व्यवसाय गरौँला भन्ने आश हो ।’

बुढा बुवाआमाको काख र छोराछोरी र श्रीमतीको माया छोडेर हिँड्नुभएका उनले भने, ‘परिवार झनै रुन्छन्, त्यसैले आँसु लुकाएर दसैँको मुखमा विदेश जानुपरेको छ ।’ यसरी दसैँको मुखमा आफन्तलाई रूपाउँदै अमिलो मन बनाएर विदेशिने नेपालीको सङ्ख्या दैनिक एक हजारको हारहारिमा छन् । यस्तै श्रमस्वीकृत लिनेको सङ्ख्या भने दैनिक एक हजार २०० रहेको वैदेशिक रोजगार विभागले जनाएको छ । अन्य समयमा यो सङ्ख्या दैनिक एक हजार २०० देखि एक जार ५०० ले श्रमस्वीकृत लिने गरेको विभागले जनाएको छ ।

विभागको यो तथ्याङ्कले चाडबाडमा पनि धेरै नेपाली मनमा पीडा बोकेर विदेशिनेको कुरालाई थप पुष्टि गरेको छ । मान्यजनको आशीर्वाद थाप्ने बेलामा परदेशमा कामको भारीले थिच्ने भएपछि विमानस्थलबाट बाहिरिने र उनीहरूका आफन्तहरूको खुसी हराएका छन् । त्यो मात्रै होइन, धेरैजना घरका मुली नै विदेश हिँडेपछि घर नै शून्य भएका छन् ।

परदेशबाट चाडबाड मान्न फर्केका नेपालीका कारण विमानस्थलमा दसैँको रौनक झनै बढेको गोरखापत्रमा खबर छ । तर दसैँको मुखैमा आफन्तसँग विछोडिएर परदेश जानेहरूको लर्कोले विमानस्थलको अर्को कुनामा खुसी हराएको देख्दा खल्लो महशुस हुन्छ ।

दसैँमा विदेश जानेको पीडा त छँदैछ, दसैँको मुखमा पैसा र आफन्तको लासको बाकसमाथि झम्टेर रोइरहेकाहरूको चित्कार र पीडा अझै दर्दनाक छ ।

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com