Follow @khasokhasmag

थानकोट–नागढुङ्गा सुरुङमार्ग पाँच वर्षमा बन्ने


प्रकाशित मिति : आश्विन १६, २०७३ आईतबार

राजधानी भित्रिने मुख्य नाका थानकोट–नागढुङ्गा सुरुङमार्ग निर्माण अबको पाँच वर्षभित्र सम्पन्न हुने बताइएको छ । सडक विभाग, वैदेशिक महाशाखाका उपमहानिर्देशक सञ्जयकुमार श्रेष्ठले थानकोटको नागढुङ्गाबाट धादिङको सिस्नेखोला निस्कने गरी निर्माण गर्न लागिएको सुरुङमार्गको सम्भाव्यता अध्ययन पूरा भएको बताउँदै सन् २०२१ सम्म सो मार्गको सम्पूर्ण निर्माण सम्पन्न हुने जानकारी दिए ।

जापानी सहयोग नियोग (जाइका)को सहयोगमा जापानी परामर्शदाता संस्थाले सो सुरुङमार्ग निर्माणसम्बन्धी सम्भाव्यता अध्ययन गरेको थियो । अध्ययन प्रतिवेदनले सुरुङमार्ग निर्माण सहज ढङ्गले गर्न सकिने सम्भावना देखाएको उपमहानिर्देशक सञ्जयकुमार श्रेष्ठले बताए । उनका अनुसार सुरुङमार्ग निर्माणको वातावरणीय प्रभाव मूल्याङ्कन (ईआईए)को कामसमेत सम्पन्न भइसकेको छ । सुरुङमार्ग निर्माण गर्न जापानी सहयोग नियोग (जाइका) सँग १६ अर्ब रुपियाँ ऋण सहयोगका लागि सम्झौताको सम्पूर्ण तयारी पूरा भइसकेको जानकारी पनि उनले दिए । अबको डेढ महिनाभित्र सम्झौता हुनेछ ।

उनले भने, ‘सम्भाव्यता अध्ययनको प्रतिवेदनपछि परामर्शदाता चयन र विस्तृत डिजाइन प्रतिवेदन (डीपीआर) तयारीका लागि कम्पनी छनोटको प्रक्रिया अगाडि बढाइएको छ, यसका लागि विभिन्न कम्पनीले इच्छा व्यक्त गरे पनि त्यो छनोटको प्रक्रियामा रहेको छ ।’ उनका अनुसार जापानको निपन कोई र सीटीआईमध्ये कुनै एउटालाई परामर्शदाताको रूपमा छनोट गर्ने प्रक्रिया अघि बढाइएको छ ।

अबको दुई महिनाभित्र डीपीआर तयार गर्न कम्पनी छनोटको प्रक्रिया टुङ्गो लाग्ने जानकारी दिँदै उनले छनोट भएका कम्पनीबाट एक वर्षभित्र विस्तृत डिजाइन प्रतिवेदन प्राप्त हुने र अबको डेढ वर्षभित्र सुरुङको निर्माण कार्य सुरु हुने जानकारी दिएका गोरखापत्रमा खबर छ । डीपीआरबाट सुरुङमार्गको डिजाइन र लागत प्राप्त हुने पनि उनले बताए । डीपीआर तयार भएपछि निर्माण कार्यका लागि टेन्डर आह्वान गरिने र निर्माण कार्य सुरु भएको तीन वर्षभित्र सम्पूर्ण निर्माण सकिने उनले जानकारी दिए । सुरुङमार्ग निर्माणका लागि जग्गा प्राप्ति र अधिग्रहणको काम भइरहेको बताउँदै उनले चालू आर्थिक वर्षमा यो काम सम्पन्न हुने जानकारी दिए ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com