अब फेसबुक र ट्वीटरमा नकारात्मक कमेन्ट गर्नेलाई कारवाही
प्रकाशित मिति : आश्विन १५, २०७३ शनिबार
अब फेसबुक र ट्वीटरमा नकारात्मक कमेन्ट गर्नेहरुलाई नेपाल प्रहरीले कारवाही गर्ने भएको छ । प्रहरी प्रधान कार्यालय अपराध अनुसन्धान विभागका प्रहरी अतिरिक्त महानिरीक्षक विज्ञानराज शर्माले वक्तब्य जारी गरी फेसबुक ट्वीटर जस्ता सबैखाले सामाजिक संजाल वा विद्युतीय माध्यमको दुरुपयोग गरी व्यक्ति वा संस्थाको इज्जत, प्रतिष्ठामा आँच पुर्याउने खालका कमेन्ट कोही कसैबाट नहुन नगराउनुहुन अनुरोध गर्नुभएको छ । यदि कोही कसैको इज्जत प्रतिष्ठामा प्रतिकुल असर पर्नेगरी अभिव्यक्ति संप्रेषण गरेमा कानुन बमोजिम कडा कारवाही हुने वक्तब्यमा जनाइको छ ।
वक्तब्यमा भनिएको छ – विश्वमा भइरहेको सुचना प्रविधिको विकाशसँगै नेपालमा पनि सुचना प्रविधि र सामाजिक सञ्जालको विकाश र प्रयोग निरन्तर बढ्दै गइरहेको परिप्रेक्षमा सामाजिक सञ्जाल तथा अन्य विद्युतीय माध्यम प्रयोग गर्ने क्रममा अश्लिल, अपशब्द तथा अनावश्यक कमेन्टको प्रयोग दिनानुदिन बृद्धि हुँदै गएको साथै सम्बन्धित पीडितहरुबाट समेत इज्जत प्रतिष्ठामा प्रतिकुल असर पर्न गएको भनी गुनासोहरु प्रहरीलाई प्राप्त हुन आइरहेको सन्दर्भमा प्रहरी प्रधान कार्यालय अपराध अनुसन्धान विभागको गम्भिर ध्यानाकर्षण भएको छ ।
