नेपालबाटै यसरी फाइल गर्न सकिन्छ अमेरिकी ग्रिनकार्ड
प्रकाशित मिति : आश्विन १२, २०७३ बुधबार
नेपालमै बसेर अमेरिकाको ग्रिनकार्डका लागि आवेदन दिन सकिने न्युयोर्कका चर्चित नेपाली कानुन व्यवसायी बासु फुलाराले बताउनुभएको छ । नेपाल भ्रमणमा रहनुभएका फूलाराले निश्चित मापदण्ड पूरा गरेका व्यक्तिले अमेरिकाको ग्रिनकार्ड नेपालमै बसेर फाइल गर्न सकिने बताउनुभयो ।
एबीसी टेलिभिजनका लागि कार्यक्रम टक अफ द टाउन युएसएमा किशोर पन्थीसँग कुराकानी गर्दै कानुन व्यवसायी फूलाराले आगामी सातादेखि खुल्ने डिभी लोटरीको फर्म भर्दा ध्यान दिनुपर्ने कुराहरुबारे पनि जानकारी दिनुभएको छ । साथै अक्टोबर १ देखि भिसा जारी हुने सन् २०१७ का डिभी लोटरी विजेताहरुले अमेरिका जानुभन्दा अगाडि ध्यानदिनुपर्ने विषयमा पनि जानकारी दिनुभएको छ ।
कार्यक्रममा कुराकानीका क्रममा एनआरएन आईसीसी सदस्य सुनिता शर्माले डिभी लोटरी परेर अमेरिकामा जानेहरुलाई कुनै समस्या परेमा सहयोग गर्न एनआरएन संगठन तयार रहेको बताउनुभयो । कुनै समस्या परेमा एनआरएन संगठनलाई सम्पर्क गर्न समेत उहाँले सुझाव दिनुभयो ।
अमेरिकाको ग्रिनकार्ड पाउने सबैभन्दा सजिलो तरिका डिभी लोटरीका लागि अर्को सातादेखि आवेदन दिन सकिने भएको छ । इस्टर्न डेलाइट टाइम अनुशार आगामी मंगलबार अक्टोबर ४ तारिख दिउसो १२ बजेदेखि डिभी लोटरीका लागि आवेदन दिन सकिनेछ । नोभेम्बर ७ सोमबार इस्टर्न टाइम अनुशार दिउसो १२ बजेसम्म डिभी लोटरी भर्न सकिनेछ । विगतका बर्षहरुमा भन्दा लोटरी फर्ममा सामान्यमात्र हेरफेर गरिएको जनाइएको छ ।
प्रस्तुत छ, मंगलबार एबीसी टेलिभिजनबाट प्रशाररित कार्यक्रम टक अफ द टाउनको पूर्ण भिडियो ।
अमेरिकी ग्रिनकार्ड, आप्रवासी भिसा, कामदार भिसा लगायत अमेरिकी कानुनका बारेमा जानकारी दिन अमेरिकाका चर्चित युवा कानुन व्यवसायी बासु फुलारा यतिबेला काठमाडौंमा हुनुहुन्छ । अक्टोबर १ देखि ७ सम्म काठमाडौंमा सप्ताहब्यापीरुपमा उहाँले यसबारेमा कानुनी जानकारीहरु प्रदान गर्नुहुनेछ ।
अमेरिकी भिसाका सन्दर्भमा धेरै नेपालीहरु दलाल र कन्सल्टेन्सीहरुबाट ठगिएको सन्दर्भमा फुलाराले प्रदान गर्नुहुने जानकारीले सरोकारवालाहरु ठगिनबाट बच्ने र अमेरिकामा आउनका लागि सही उपाय अबलम्बन गर्ने अपेक्षा गरिएको छ ।
फुलाराले नेपालमै बसेर अमेरिकाको ग्रिनकार्ड कसरी आवेदन दिने, अमेरिकी ग्रिनकार्ड वा नागरिकता भएकाहरुले उनीहरुका परिवारलाई अमेरिकामा कसरी झिकाउने, अमेरिकामा कम्पनी खोल्न र कम्पनीमा काम गर्न चाहनेहरुले अपनाउन सक्ने प्रकृया लगायत आप्रवासी भिसा र ग्रिनकार्डका सन्दर्भमा कानुनी जानकारी प्रदान गर्नुहुनेछ । तर एसाइलम र भिजिटर भिसाहरुको सन्दर्भमा भने कुनै परामर्श नगरिने फुलाराले जनाउनुभएको छ ।
व्यक्तिगत र सामुहिक रुपमा भेटेर यी लगायत अमेरिकी अध्यागमन कानुनसँग सरोकार राख्ने विषयमा जानकारी लिन सकिनेछ ।