जन्मस्थलले गुन लगायो योगेशलाई, १२ हजार ५ सय ९१ मतान्तरले विजयी
प्रकाशित मिति : मंसिर २३, २०७४ शनिबार
मंसिर २३, २०७४-यसअघि एमाले सचिव योगेश भट्टराइलाई मानसिक यातना दिन एउटै कुरा गरे हुन्थ्यो ‘निर्वाचन’। निर्वाचन भन्ने शब्दले उनलाई तर्साउथ्यो । राजनीतिक उचाइ लिएर युवा नेताको रुपमा कहलिए पनि भट्टराइलाई काठमाडौंका मतदाताले विश्वास गरेनन् त्यो पनि एक पटक होइन, दुइ पटक । तर, तिनै भट्टराइलाई जन्मस्थलले भने पहिलो पटकमै विजयी गराएर संसद् भवन छिर्ने ढोका खोलिदिएको छ । भट्टराई २९ हजार ४७९ मत ल्याएर विजयी भएका छन् । यो निकटतम प्रतिस्पर्धीभन्दा १२ हजार ५ सय ९१ बढी मत हो ।
प्रतिस्पर्धी कांग्रेसका केशवप्रसाद दाहालले १६ हजार ८८८ मत ल्याएका छन् । उनलाई शनिबार बिहान मुख्य निर्वाचन अधिकृतको कार्यालयले विजयी घोषणा गरेको थियो ।मैवाखोला गाउँपालिका साविकको साँघु गाविसमा जन्मिएका योगेशले जन्मस्थलमा निम्न माध्यमिक तहसम्मको शिक्षामात्रै हासिल गरे । एसएलसीका लागि संखुवासभाको मादी गए । मावलीमा बसेर पढे र उच्च शिक्षाका लागि राजधानी हानिए । त्यहीबाट राजनीतिक यात्रा सुरु गरेका उनी एमालेको विद्यार्थी संगठन अनेरास्ववियुको अध्यक्ष भए । हाल एमाले पार्टी सचिव तथा प्रचार विभाग प्रमुख रहेका भट्टराईले जन्मस्थललाई गत वर्षदेखि सम्झिएका हुन् । गत वर्षदेखि ताप्लेजुङको राजनीतिसँग बाक्लैगरी उपस्थित भएका थिए ।
यतिसम्मकी गत मंसिरमा सुकेटार विमानस्थलमा भएको कञ्चनजंघा हिरक महोत्सवमा उनले ताप्लेजुङको विकासको खाका प्रस्तुत गरेका थिए । माओवादीको तर्फबाट तत्कालीन सांसद वाङ्दी शेर्पाले योगेशले के आधारमा विकासको खाका प्रस्तुत गर्ने भनेर विवाद पनि भएको थियो । महोत्सवमा राजनीतिक हिसाबले कांग्रेसका ज्ञानेन्द्र कार्कीलाई भट्टराईभन्दा मर्यादाक्रममा दोस्रो स्थानमा राखिएको थियो । कार्यक्रम बनाउने तत्कालीन प्रमुख जिल्ला अधिकारी चक्रपाणि पाण्डे कारबाहीको सिकार बने र गृहमन्त्रालय तानिए । भट्टराई स्थानीय एफएम रेडियोलाई बाक्लै अन्तवार्ता दिनेगर्थे भने स्थानीय तहको निर्वाचनमा १५ दिन बढी जिल्लाकै गाउँहरुमा भोट माग्न हिँडेका थिए ।
भट्टराईले स्थानीय तहको निर्वाचनपछि आफ्नो नामावली जन्मस्थल साँघुमा सारेका थिए । उनले मुख्य मन्त्रीका लागि जोड गरे पनि त्यहाँ सम्भावना नदेखेपछि प्रतिनिधिसभाको उम्मेदवार बनेका हुन् । प्रजातन्त्रप्राप्ति पछि नै ताप्लेजुङ बढी कम्युनिष्ट मतदाता भएको जिल्ला हो । निर्वाचन क्षेत्र नम्बर २ मा अहिलेसम्म अरुले जितेका छैनन् । लगातार २५ वर्षदेखि जितेको भन्दै एमालेले गत वर्ष रजत महोत्सव पनि मनाएको थियो ।
आङवोहाङको पनि तेस्रो भाग्य
दुई पटक यही क्षेत्रमा पराजित माओवादी केन्द्रका उम्मेदवार टंक आङवोहाङको तेस्रो पटक भाग्य खुलेको छ । उनले १२ हजार १९८ मत ल्याएर प्रदेशसभामा विजय हासिल गरेका छन् । उनका निकटतम प्रतिस्पर्धा कांग्रेसका दिपेन्द्रकुमार सेन्दाङले ७ हजार ५८६ मत प्राप्त गरेका थिए । आङवोहाङले सेन्दाङलाई ४ हजार ६ सय ११ मतान्तरले पराजित गरेका हुन् ।
वाम गठबन्धन नहुँदासम्म उम्मेदवार नबन्ने सोच बनाएका आङवोहाङ गठबन्धनपछि उम्मेदवार बनेका थिए । २५ वर्षदेखि जितेको ठाउँ माओवादीलाई बुझाएको भन्दै एमाले कार्यकर्ताले सुरुमा आक्रोश पोखेका थिए । तर मत नबिगारेको एमालेका एक जिल्लास्तरीय नेताले बताए ।
