सन् २०२७ को स्वास्थ्य बिमा लिन न्युयोर्क सिटीको आग्रह, मेडिकेडका नियममा परिवर्तन हुँदै
न्युयोर्क — न्युयोर्क सिटीका स्वास्थ्य अधिकारीहरूले सन् २०२७ का लागि स्वास्थ्य बिमा लिन वा नवीकरण गर्न सर्वसाधारणलाई आग्रह गरेका छन्। जनवरी ३१ को अन्तिम समयसीमा र मेडिकेडसम्बन्धी संघीय नियममा हुन लागेको परिवर्तनलाई ध्यानमा राख्दै सहरले बहुभाषिक जनचेतना अभियान सुरु गरेको छ।
न्युयोर्क स्टेट अफ हेल्थ मार्केटप्लेसमार्फत स्वास्थ्य बिमाका लागि आवेदन अवधि सुरु भइसकेको छ। जनवरी १ देखि लागू हुने स्वास्थ्य बिमा लिन चाहनेहरूले डिसेम्बर १५ भित्र आवेदन दिनुपर्ने सहरको स्वास्थ्य विभागले जनाएको छ। आवेदन अवधि जनवरी ३१, २०२७ मा समाप्त हुनेछ।
“स्वास्थ्य बिमासम्बन्धी प्रक्रिया अलमलपूर्ण हुन सक्छ, तर हाम्रो भर्ना परामर्शदाताको सहयोग लिएपछि यो त्यति कठिन हुँदैन,” न्युयोर्क सिटीका स्वास्थ्य आयुक्त डा. एलिस्टर एफ. मार्टिनले प्रेस विज्ञप्तिमा भनेका छन्।
“आफू र आफ्नो परिवारलाई स्वस्थ राख्न तथा अप्रत्याशित रूपमा ठूलो उपचार खर्चबाट बच्न आवेदन अवधिमा स्वास्थ्य बिमाका लागि आवेदन दिनुहोस् वा आफ्नो बिमा नवीकरण गर्नुहोस्,” मार्टिनले भनेका छन्।
स्वास्थ्य विभागका अनुसार सोमबारदेखि सुरु भएको विज्ञापन अभियानअन्तर्गत अंग्रेजी, स्पेनिस र चिनियाँ भाषामा सन्देशहरू प्रसारण गरिँदै छन्। सामाजिक सञ्जाल, रेडियो र पत्रपत्रिकाका साथै डेली, फार्मेसी र लन्ड्रोम्याटजस्ता स्थानीय व्यवसायमा पनि प्रचार सामग्री राखिएको छ।
यो अभियान मेडिकेडसम्बन्धी नयाँ संघीय नियमहरू जनवरी १ देखि लागू हुन लागेका बेला सुरु भएको हो। नयाँ व्यवस्थाअनुसार मेडिकेड प्राप्त गरिरहेका वा त्यसका लागि आवेदन दिने १९ देखि ६४ वर्ष उमेर समूहका केही वयस्कले कामसम्बन्धी सर्त पूरा गर्नुपर्नेछ। त्यस्तै, केही व्यक्तिले आफ्नो स्वास्थ्य बिमा वार्षिक रूपमा नवीकरण गर्नुको सट्टा प्रत्येक छ महिनामा नवीकरण गर्नुपर्नेछ।
नयाँ नियमबाट प्रभावित व्यक्तिहरूले स्वास्थ्य बिमा कायम राख्न आफूले गरेको काम, विद्यालयमा अध्ययन, स्वयंसेवा वा रोजगारीसम्बन्धी तालिममा सहभागिताको विवरण पेस गर्नुपर्ने विभागले जनाएको छ। योग्य अपाङ्गता भएका व्यक्तिहरूलाई भने यी सर्तबाट छुट दिइनेछ।
नयाँ नियम आफूमा लागू हुन्छ कि हुँदैन भन्ने जानकारी राज्यका अधिकारीहरूले हुलाक वा इमेलमार्फत पठाउनेछन्। त्यसैले मार्केटप्लेस खातामा आफ्नो सम्पर्क विवरण अद्यावधिक राख्न र बिमा नवीकरणसम्बन्धी सूचनामा ध्यान दिन विभागले आग्रह गरेको छ।
मेडिकेडअन्तर्गतको स्वास्थ्य बिमा कार्डमा ‘मेडिकेड’ शब्दको सट्टा निजी बिमा कम्पनीको नाम लेखिएको हुन सक्नेबारे पनि अधिकारीहरूले सचेत गराएका छन्। आफ्नो बिमाको अवस्थाबारे अन्योल भएमा कार्डमा उल्लेख गरिएको सदस्य सेवा नम्बरमा सम्पर्क गर्न सकिनेछ।
न्युयोर्क सिटीका निःशुल्क स्वास्थ्य बिमा परामर्शदाताले नयाँ बिमाका लागि आवेदन दिन, पुरानो बिमा नवीकरण गर्न, उपलब्ध विकल्पबारे जानकारी लिन र मेडिकेडका नयाँ नियम बुझ्न सहयोग गर्नेछन्। यसका लागि ८६६-४६७-८७३३ मा फोन गर्न वा nyc.gov/healthcoverage मा जान सकिनेछ।
आवेदनको समयसीमा मार्केटप्लेसमार्फत उपलब्ध निजी स्वास्थ्य बिमा योजनामा मात्र लागू हुन्छ। मेडिकेड, चाइल्ड हेल्थ प्लस र इसेन्सियल प्लानका लागि भने वर्षभरि नै आवेदन दिन सकिन्छ। यद्यपि, कुन कार्यक्रमका लागि को योग्य हुन्छ भन्ने कुरा सम्बन्धित कार्यक्रम र व्यक्तिको अवस्थाअनुसार फरक पर्छ।
आम्दानी वा आप्रवासनको अवस्थाका आधारमा मात्र स्वास्थ्य सेवा पहुँचबाट वञ्चित हुनुपर्ने अवस्था नरहेको विभागले जनाएको छ। तर सबै व्यक्तिले सबै प्रकारका स्वास्थ्य बिमा कार्यक्रमको सुविधा पाउँछन् भन्ने होइन। स्वास्थ्य बिमा लिन नसक्ने वा खर्च धान्न नसक्ने व्यक्तिले सहरका स्वास्थ्य क्लिनिक, संघीय सरकारबाट मान्यता प्राप्त सामुदायिक स्वास्थ्य केन्द्र वा एनवाईसी केयरमार्फत उपचार सेवा प्राप्त गर्न सक्नेछन्।
एनवाईसी केयर स्वास्थ्य बिमा योजना नभई न्युयोर्क सिटीको स्वास्थ्य सेवा पहुँच कार्यक्रम हो। एनवाईसी हेल्थ प्लस हस्पिटल्समार्फत सञ्चालन हुने यस कार्यक्रमले स्वास्थ्य बिमा प्राप्त गर्न योग्य नभएका वा त्यसको खर्च धान्न नसक्ने योग्य न्युयोर्कवासीलाई निःशुल्क वा कम खर्चमा स्वास्थ्य सेवा उपलब्ध गराउँछ।





