टेक्सस गोलीबारी काण्ड: थप ७ जनालाई आतंकवादी अभियोगमा जेल सजाय
प्रकाशित मिति : १७ असार २०८३, बुधबार
फोटो : टिन्गी इन्जुरी ल फर्म
टेक्ससस्थित एक अध्यागमन हिरासत केन्द्र बाहिर प्रदर्शनका क्रममा भएको गोलीबारीलाई लिएर बुधवार सात जनालाई संघीय आतंकवादी अभियोगमा जेल सजाय सुनाइएको छ। यसअघि गत हप्ता मात्रै सोही घटनामा संलग्न अन्य आठ जनालाई दशकौँ लामो जेल सजाय सुनाइएको थियो।
बुधवार फोर्ट वर्थमा सजाय सुनाइएकामध्ये एक जनाबाहेक अन्य सबैले डलास नजिकैको प्रेरील्याण्ड डिटेन्सन सेन्टर बाहिर भएको जुलाई ४ को गोलीबारीसँग सम्बन्धित अभियोगहरूमा आफ्नो दोष स्वीकार गरेका थिए। उनीहरूलाई दुई वर्षदेखि १५ वर्षसम्मको जेल सजाय तोकिएको छ।
गत हप्ता अदालतले दोषी ठहर गरेका अन्य आठ जनालाई भने कडा र लामो जेल सजाय सुनाइएको छ। सजाय पाउनेहरूमा अमेरिकी नौसेनाका पूर्व रिजर्भ सैनिक पनि छन्, जसलाई १०० वर्षको जेल सजाय सुनाइएको छ।
सरकारी वकिलहरूका अनुसार प्रदर्शनकारीहरूले हतियार, प्राथमिक उपचार सामाग्री र बुलेटप्रुफ ज्याकेट बोकेका थिए, जसले उनीहरूको खराब नियत स्पष्ट पार्छ। बुधवार सजाय सुनाउने दुई न्यायाधीशमध्येका एक, अमेरिकी जिल्ला न्यायाधीश मार्क पिटम्यानले उक्त हिरासत केन्द्र आवासीय क्षेत्रमा अवस्थित रहेको कुरामा जोड दिए।
यो घटना एउटा भयानक नरसंहारमा परिणत हुन सक्थ्यो, न्यायाधीश पिटम्यानले भने।
अमेरिकी जस्टिस डिपार्टमेन्टले यो गोलीबारी ‘एन्टिफा’का सदस्यहरूले गराएको दाबी गरेको छ, तर प्रतिवादीका वकिलहरूले भने यसलाई अस्वीकार गरेका छन्। एन्टिफा प्रदर्शनहरूमा नव-नाजी र गोरा जातिय श्रेष्ठतावादीहरूको विरोध गर्ने चरम वामपन्थी उग्रवादी समूहहरूको एउटा छाता संगठन हो।
प्रतिवादीका वकिलहरूले आफ्ना ग्राहकहरूले कुनै पनि किसिमको आक्रमणको योजना नबनाएको र आत्मरक्षाका लागि मात्र हतियार बोकेको बताए। उनीहरूका अनुसार, हिरासतमा रहेका आप्रवासीहरूलाई समर्थन जनाउनका लागि आतिशबाजी सहितको रात्रिकालीन प्रदर्शन मात्र तय गरिएको थियो।
गोलीबारीको घटनामा ज्यान मार्ने उद्योग लगायत अन्य अभियोगमा दोषी ठहरिएका पूर्व मरीन रिजर्भ सैनिक बेन्जामिन सोङलाई १०० वर्षको जेल सजाय सुनाइएको छ। अन्य सात जनालाई ३० देखि ७० वर्षसम्मको जेल सजाय दिइएको छ। सोङ लगायत केही प्रतिवादीहरूले यस फैसला विरुद्ध पुनरावेदन दर्ता गराइसकेका छन्।
अदालतबाट दोषी ठहरिएकाहरूमध्ये एक जनाबाहेक सबैमाथि आतंकवादीहरूलाई भौतिक सहयोग पुर्याएको अभियोग लागेको थियो। बुधवार सजाय सुनाइएका र मुद्दाको सामना नगरेका (दोष स्वीकार गरेका) ६ जना प्रतिवादीहरूले पनि आतंकवादीहरूलाई सहयोग गरेको कुरा स्वीकार गरेका थिए। तीमध्ये केही घटनाको रात प्रदर्शनमा उपस्थित थिए भने केहीलाई गोलीबारीपछि सोङलाई पक्राउ पर्नबाट जोगाउन सहयोग गरेको आरोप लागेको थियो।
अदालतमा प्रेरील्याण्डका गाडीहरू तोडफोड गरेकोमा माफी मागेका नाथन बाउम्यानलाई बुधवार करिब दुई वर्षको जेल सजाय सुनाइयो। बाउम्यानले भने, मैले जे गरेँ, त्यसको बचाउमा भन्नुपर्ने कुनै तर्क छैन।
नौ वर्षको जेल सजाय पाएका जन थॉमस जुलाई ४ को प्रदर्शनमा उपस्थित थिएनन्। तर अदालतको दस्तावेज अनुसार उनले सोङलाई एक ठाउँबाट अर्को ठाउँमा सारेर र लुगा कपडा उपलब्ध गराएर प्रहरीबाट भाग्न मद्दत गरेका थिए। थॉमसले न्यायाधीशसँग भने, म यसमा संलग्न भएकोमा निकै दुःखी छु।
अदालतबाट दोषी ठहरिएकामध्ये इनेस सोटोलाई बुधवार ५० वर्षको जेल सजाय सुनाइयो। उनलाई आतंकवादीहरूलाई भौतिक सहयोग गरेको, दङ्गा फैलाएको र विष्फोटक पदार्थ सम्बन्धी अभियोगमा दोषी पाइएको थियो।
यस मुद्दालाई नागरिक अधिकारकर्मीहरूले नजिकबाट नियालिरहेका छन्। उनीहरूका अनुसार यो फैसलाले देशभरिका प्रदर्शनकारीहरू र अभिव्यक्ति स्वतन्त्रताको संवैधानिक अधिकार माथि गम्भीर असर पार्न सक्छ।
आतंकवादीहरूलाई भौतिक सहयोग गरेकोमा आफ्नो दोष स्वीकार गरेकी बाँकी एक महिलालाई आगामी सोमबार सजाय सुनाइनेछ। अदालतको दस्तावेज अनुसार उनले पनि सोङलाई प्रहरीबाट लुक्न मद्दत गरेकी थिइन्।