अमेरिकाको दाबी: इरानी मिसाइल उत्पादन कारखाना ध्वस्त
प्रकाशित मिति : ५ चैत्र २०८२, बिहिबार
फोटो : एपी/रासस
अमेरिकाले इरानको मिसाइल उत्पादन गर्ने कारखाना पूर्ण रूपमा ध्वस्त बनाएको दाबी गरेको छ। अमेरिकी सेनाका अनुसार इरानको कराजस्थित सतहदेखि सतहमा प्रहार गर्ने मिसाइल उत्पादन केन्द्र नष्ट गरिएको हो।
सेन्टकम का अनुसार उक्त प्लान्टमा अमेरिकी नागरिक, छिमेकी मुलुकहरू तथा व्यावसायिक जहाजहरूका लागि खतरा मानिएका ब्यालिस्टिक मिसाइलहरू तयार गरिन्थ्यो। स्रोतहरूका अनुसार इरानको राजधानी तेहरानमा निरन्तर आक्रमण भइरहेको छ। इरानी सञ्चारमाध्यमहरूले पनि राजधानीमा नयाँ हमला भएको पुष्टि गरेका छन्।
यसैबीच, इरानको प्रमुख प्राकृतिक ग्यास क्षेत्रमा भएको आक्रमणले इजरायल र अमेरिका युद्धका लक्ष्यहरूमा कति एकमत छन् भन्ने प्रश्न खडा गरेको छ। इजरायली प्रधानमन्त्री बेन्जामिन नेतान्याहुले यी अड्कलबाजीहरूलाई “फेक न्युज” भन्दै खारेज गरिदिएका छन्। उनले इजरायलले अमेरिकालाई युद्धमा तानेको भन्ने दाबीलाई समेत अस्वीकार गरेका छन्।
नेतान्याहुले इरानी शासन विश्वकै लागि गम्भीर खतरा रहेको कुरामा पुनः जोड दिएका छन्। अमेरिकी राष्ट्रपति डोनाल्ड ट्रम्पले पनि लामो समयदेखि यही धारणा राख्दै आएको उनको दाबी छ।
हिब्रु भाषामा सम्बोधन गर्दै नेतान्याहुले इजरायली जनताको धैर्यताको प्रशंसा गरे र विश्वले पनि यस विषयमा दीर्घकालीन दृष्टिकोण अपनाउनुपर्ने संकेत गरे। युद्धको पहिलो २० दिनपछि इरानसँग युरेनियम संवर्द्धन गर्ने क्षमता र ब्यालिस्टिक मिसाइल उत्पादन गर्ने सामर्थ्य बाँकी नरहेको उनको दाबी छ। यद्यपि, इरानले इजरायलतर्फ रकेट प्रहार गर्न भने छाडेको छैन।
पूर्व नेटो सर्वोच्च कमान्डर वेस्ली क्लार्कले इजरायलले इरानको ‘साउथ पार्स’ ग्यास क्षेत्रमा एक्लै पनि आक्रमण गरेको हुन सक्ने बताएका छन्। क्लार्कका अनुसार इरान अहिले “जित्न नसक्ने अवस्थामा” छ। उनले इरानलाई ब्यालिस्टिक मिसाइलमा लगानी रोक्न र क्षेत्रीय सुरक्षाका लागि सम्झौता गर्न सुझाव दिएका छन्। साथै, इरानी नेतृत्वलाई आफ्नै जनताको बहुमतले समर्थन नगरेको वास्तविकता बुझ्न पनि उनले आग्रह गरे।