इरानसँग तत्काल कुनै सम्झौताको सम्भावना नरहेको ट्रम्पको भनाइ
प्रकाशित मिति : ३० फाल्गुन २०८२, शनिबार
अमेरिकी राष्ट्रपति डोनाल्ड ट्रम्पले इरानसँग तत्काल कुनै पनि सम्झौता हुने सम्भावना नरहेको बताएका छन्। ट्रम्पका अनुसार इरान सम्झौता गर्न इच्छुक देखिए पनि उसका प्रस्तावित सर्तहरू पर्याप्त नभएकाले अमेरिका अहिले सम्झौता गर्ने पक्षमा छैन।
“इरान सम्झौता गर्न चाहन्छ, तर म अहिले त्यसका लागि तयार छैन किनकि सर्तहरू अझै राम्रा छैनन्,” ट्रम्पले भने। उनले सम्भावित सम्झौता “धेरै बलियो र ठोस” हुनुपर्ने पनि बताएका छन्।
सम्झौताका सर्तहरू के हुन सक्छन् भन्ने प्रश्नमा भने ट्रम्पले कुनै विवरण दिन अस्वीकार गरे। उनले भने, “म त्यो कुरा अहिले भन्न चाहन्न।”
ट्रम्पले इरानका नयाँ सर्वोच्च नेता मोज्तवा खामेनीको अवस्थाबारे पनि शंका व्यक्त गरेका छन्। सत्ता सम्हालेपछि उनी सार्वजनिक रूपमा देखिएका छैनन् भन्दै ट्रम्पले भने, “मलाई त उनी जीवित छन् कि छैनन् भन्ने पनि थाहा छैन। अहिलेसम्म कसैले पनि उनलाई देखाउन सकेको छैन।”
उनले थपे, “म सुन्दै छु कि उनी जीवित छैनन्। यदि उनी जीवित छन् भने आफ्नो देशका लागि सबैभन्दा बुद्धिमानी काम भनेको आत्मसमर्पण गर्नु हो।”
भविष्यमा इरानको नेतृत्व कसले गर्नुपर्छ भन्ने विषयमा पनि ट्रम्पले कुनै व्यक्तिको नाम लिएनन्। उनले केवल यति भने, “देशको भविष्यका लागि उत्कृष्ट नेतृत्व गर्न सक्ने मानिसहरू जीवित छन्।”
यसै क्रममा उनले केही देशहरूले ‘स्ट्रेट अफ हर्मुज’ को सुरक्षामा सहयोग गर्ने प्रतिबद्धता जनाएको उल्लेख गरे पनि ती देशहरूको नाम सार्वजनिक गर्न भने अस्वीकार गरे।
ट्रम्पले इरानको तेल निर्यातका लागि रणनीतिक रूपमा महत्त्वपूर्ण मानिने खर्ग आइल्याण्डलाई अमेरिकाले “पूर्ण रूपमा ध्वस्त” पारेको दाबी समेत गरेका छन्।
तेलको मूल्य बढ्न सक्ने चिन्तालाई उनले सामान्य रूपमा लिँदै भने, “बजारमा तेल र ग्यास पर्याप्त मात्रामा उपलब्ध छ। अहिले केही अवरोध देखिए पनि छिट्टै सबै अवस्था सहज हुनेछ।”