ट्रम्पको नयाँ अध्यागमन रणनीति: फारम भर्दाको सानो गल्तीले खोसिन सक्छ अमेरिकी नागरिकता
प्रकाशित मिति : पुस २३, २०८२ बिहीबार
फोटो: युएससीआईएस
राष्ट्रपति ट्रम्पले आफ्नो प्रशासनले केही अंगीकृत अमेरिकीहरूको नागरिकता खारेज गर्ने कदम चालिरहेको बताएका छन् । यस प्रक्रियामा विशेष गरी सोमाली मूलका नागरिकहरूलाई लक्षित गरिएको छ।
ओभल अफिसमा भएको एक अन्तर्वार्तामा ट्रम्पले यदि उनीहरू बेइमान थिए भने तुरुन्तै उनीहरूको नागरिकता खोस्ने बताएका छन् । सोमालियाबाट आएका धेरै मानिसहरू अमेरिकालाई घृणा गर्ने आफूलाई लागेको उनले बताए ।
न्युयोर्क टाइम्सका पत्रकारहरूसँगको झण्डै दुई घण्टा लामो अन्तर्वार्तामा ट्रम्पले नागरिकता खोस्ने मापदण्डहरू आफ्नो प्रशासनले अध्ययन गरिरहेको बताए । यो प्रयास सोमाली समुदायमा मात्र सीमित नरहेको भए पनि अन्य कुन समूहलाई लक्षित भए नभएकोबारे उनले खुलाउन चाहेनन् ।
ट्रम्पले वर्षौंदेखि सोमाली समुदायमाथि कडा टिप्पणी गर्दै आएका छन् । हालैका महिनाहरूमा उनले मिनेसोटाको सोमाली डायस्पोरामा भएको भनिएको धोखाधडीको अनुसन्धानलाई लिएर पूरै समुदायमाथि प्रश्न उठाएका छन् ।
सन् २०२२ देखि संघीय अभियोजकहरूले कोभिड १९ महामारीका बेला बालबालिकालाई खाना खुवाउने सरकारी कार्यक्रमबाट करोडौँ डलर चोरेको आरोपमा दर्जनौं व्यक्तिहरूलाई दोषी ठहर गरिसकेका छन्। धेरै सोमाली अमेरिकीहरूले यस ठगी काण्डले उनीहरूको समुदायको प्रतिष्ठामा ठूलो चोट पुर्याएको भन्दै चिन्ता व्यक्त गरेका छन्।
ट्रम्प प्रशासनले अध्यागमन निकायहरूलाई आर्थिक वर्ष २०२६ मा प्रति महिना १०० देखि २०० वटा नागरिकता खारेजीका मुद्दाहरू बुझाउन निर्देशन दिएको छ। संघीय कानुन अनुसार कुनै व्यक्तिले नागरिकताका लागि आवेदन दिँदा ठगी गरेको खण्डमा वा अन्य केही सीमित परिस्थितिमा मात्र नागरिकता खारेज गर्न सकिन्छ।
तर अधिकारकर्मीहरूले भने नागरिकता फारम भर्दा अन्जानमा भएका सामान्य गल्तीका कारण पनि निर्दोष व्यक्तिहरू यसको मारमा पर्न सक्ने भन्दै चेतावनी दिएका छन्।