ग्रिनकार्ड अन्तर्वार्ताका क्रममा बेलायती नागरिक ६ महिनाको बच्चासहित पक्राउ
प्रकाशित मिति : १० मंसिर २०८२, बुधबार
फोटो: इथान विल्किन्सन
आफ्नो ६ महिनाको बच्चासहित ग्रिन कार्ड अन्तर्वार्ता दिन उपस्थित बेलायती नागरिक केटी पाउललाई स्यान डिएगोस्थित अमेरिकी नागरिकता तथा अध्यागमन सेवा कार्यालयमा आइसका अधिकारीहरुले पक्राउ गरेका छन् । ६ महिनाको बच्चा बोकेर उनी अन्तर्वार्ता दिन उपस्थित भएकी थिइन् । बच्चा च्यापेर अन्र्तवार्ता दिन पुगेका बेला आइसले पक्राउ गरेको हो ।
पाउल उनका पतिसमेत ग्रिन कार्ड अन्तर्वार्ताका लागि कार्यालयमा पुगेका थिए । उनी ग्रिनकार्ड स्वीकृतिको अन्तिम चरणमा थिए, आइस अधिकारीहरुभित्र आए र ६ महिनाको छोरा काखमा लिएकी उनलाई पक्राउ गरियो ।
“सुरुमा उनी ग्रिन कार्डको प्रक्रिया पूरा गर्दासम्म बेलायत फर्किने योजनामा थिइन्, तर उनी गर्भावस्थाको उच्च जोखिममा रहेको भनियो, त्यसैले उनले अमेरिकाबाटै यो प्रक्रिया मिलाउने निर्णय गरेकी थिइन्,” उनकी आमा ५५ वर्षीया जुल्स पिटर्सले भनिन् ।
गर्भावस्थाले यताउता हिडडुल गर्न समस्या भएपछि पाउलले वकिलहरुको सल्लाहमा ग्रिनकार्डको लागि आवेदन दिएकी थिइन् ।
अन्तर्वार्ताका क्रममा पनि आइसले मानिसहरु पक्राउ गरिरहेको छ । अदालतमा उपस्थित आप्रवासीहरुलाई पनि आइस अधिकारीहरुले पक्राउ गरी हिरासतमा लिन थालेपछि यसको चौतर्फी विरोध समेत भइरहेको छ ।