मस्कले कसरी र कति समय गुमाए ‘विश्वकै धनी व्यक्ति’ को उपाधि ?
प्रकाशित मिति : भाद्र २४, २०८२ बुधबार
एलन मस्कले केही घण्टाका लागि ‘विश्वकै धनी व्यक्ति’ को उपाधि गुमाएका छन । उनलाई पछि पार्दै ओराकलका सह-संस्थापक लेरी एलिसन विश्वकै धनी व्यक्ति बनेका थिए, तर यो स्थिति धेरै समय कायम रहन सकेन।
बुधबार, ओराकलको सेयर मूल्यमा भएको भारी वृद्धिका कारण लेरी एलिसनको सम्पत्ति एकै दिनमा ८९ बिलियन डलरले बढेर ३८३.२ बिलियन डलर पुगेको थियो। यसले उनलाई केही घण्टाका लागि मस्कभन्दा अगाडि पुर्यायो र उनी विश्वकै धनी व्यक्तिको सूचीमा पहिलो स्थानमा उक्लिए।
तर, बजार बन्द हुँदासम्म मस्कको कुल सम्पत्ति ३८४.२ बिलियन डलर पुग्यो, जसले गर्दा उनले पुनः आफ्नो उपाधि फिर्ता पाए। ओराकलले सार्वजनिक गरेको त्रैमासिक नतिजापछि कम्पनीको सेयर मूल्य ४३ प्रतिशतसम्म बढेको थियो, जुन सन् १९९२ यताकै सबैभन्दा ठूलो एक-दिने वृद्धि हो।
लेरी एलिसन ले सन् १९७७ मा कलेज छोडेर ओराकलको स्थापना गरेका थिए। ट्रम्पसँग नजिक रहेका ८१ वर्षीय एलिसनले सरकारी ठेक्काहरू प्राप्त गर्नमा पनि भूमिका खेलेका छन्। एलिसनले टिकटक खरिद गर्न सक्ने सम्भावित दाबेदारको रूपमा पनि चर्चा पाएका छन्।
चीनको बाइटडान्सले स्वामित्व त्याग्न नसके अमेरिकामा प्रतिबन्धको जोखिममा रहेको टिकटकका बारेमा राष्ट्रपति ट्रम्पले भनेका थिए, “मलाई लाग्छ लेरीले किन्नु पनि राम्रो हुन्छ।”
लेरी एलिसनका मिडियासम्बन्धी महत्वाकांक्षा टिकटकभन्दा पनि फराकिलो छन्। उनले आफ्ना छोरा डेभिड एलिसनले नेतृत्व गर्ने स्काइ डान्समार्फत प्यारामाउन्टको स्वामित्व खरिद गर्न ८ बिलियन डलरको प्रस्तावमा ठूलो लगानी गरेका थिए। यो सम्झौता गत महिना सम्पन्न भएको हो।
सीईओ सफ्रा क्याट्जका अनुसार ओराकलले एआई कम्पनीहरूको विशाल कम्प्युटिङ माग पूरा गर्नका लागि आफ्नो क्लाउड र डाटाबेस इन्फ्रास्ट्रक्चरलाई विस्तार गर्दै आएको छ।
मस्कले पहिलोपटक सन् २०२१ मा यो उपाधि पाएका थिए र धेरै समयसम्म कायम राखे। यसअघि पनि उनले बर्नार्ड अर्नाल्ट र जेफ बेजोससँग केही समयका लागि उपाधि गुमाएका थिए।
यस वर्ष भने टेस्लाको सेयर करिब १४ प्रतिशतले घटेको छ। मस्कलाई टेस्लाका भविष्यका उपलब्धिहरू पूरा भएमा करिब १ ट्रिलियन डलर बराबरको नयाँ तलब प्याकेज प्रस्ताव गरिएको छ।