अमेरिकी विश्वविद्यालयहरूमा झूटा ‘सुटर’ सूचनाको आतंक, एफबीआईद्वारा छानबिन

नेपाल डेस्क

---

प्रकाशित मिति : भाद्र ९, २०८२ मंगलबार

अमेरिकी विश्वविद्यालयहरूमा ‘सुटर’ (निशानेबाज) सम्बन्धी झूटा सूचना (होक्स) बारे एफबीआईले छानबिन सुरु गरेको छ। नयाँ शैक्षिक सत्र सुरु भएदेखि भएका यी घटनाले विद्यार्थी, अभिभावक र शिक्षकहरूबीच ठूलो आतंक फैलाएको छ।

हालसम्म, करिब एक दर्जन विश्वविद्यालयहरूमा आपतकालीन सेवामा झूटा फोन गरेर विशेष हतियारसहितको प्रहरी टोली (स्वाटिङ) पठाउने घटनाहरू भएका छन्।

अमेरिकी अधिकारीहरूले यस्ता ‘स्वाटिङ’ लाई पछिल्ला वर्षहरूमा लोकप्रिय हुँदै गएको खतरनाक गतिविधि बताएका छन्। ‘स्वाटिङ’लाई झूटा आक्रमण खबर दिने प्रवृत्ति वा आतङ्क फैलाउने गलत सूचना भनेर भन्न सकिन्छ। एफबीआईले जारी गरेको विज्ञप्तिमा जनतालाई सचेत रहन र शङ्कास्पद गतिविधि देखिए तुरुन्त प्रहरीलाई जानकारी दिन आग्रह गरिएको छ।

पेन्सिलभेनियाको क्याथोलिक संस्था भिल्लानोभा विश्वविद्यालय चार दिनभित्रै दुई पटक धम्कीको शिकार भएको छ। एक छात्रा एभा पेट्रोस्कीले भनिन्, “त्यो क्षण मलाई लाग्यो, ‘अब म मर्ने भएँ’।” उनी अभिमुखीकरण समारोहमा गाइरहेकी थिइन्, जब मानिसहरू हतारहतार दौडन थाले।

खसोखास निशुल्क सब्सक्राइब गर्नुहोस् 🙏

अब तपाईँले अमेरिकी भिसा, ग्रीनकार्ड लगायत सम्पूर्ण अध्यागमन अद्यावधिकहरू तथा आवास, कर, स्वास्थ्य सेवा लगायतका विषयमा सूचना र स्रोतहरू छुटाउनु पर्नेछैन। ती सबै सिधै तपाईँको इनबक्समा प्राप्त गर्नुहुनेछ।

इमेल ठेगाना यहाँ प्रविष्ट गर्नुहोस्…

सब्सक्राइब गर्न यहाँ क्लिक गर्नुहोस्

त्यसै दिन टेनेसी विश्वविद्यालय, चट्टानुगामा पनि झूटा खबर पुग्दा क्याम्पस लकडाउनमा गयो। अन्य प्रभावित विश्वविद्यालयहरूमा आयोवा स्टेट, आर्कान्सस (फेएटभिल), नर्दर्न एरिजोना, साउथ क्यारोलिना, डोने विश्वविद्यालय, न्यू ह्याम्पशायर, कोलोराडो बोल्डर र कान्सास स्टेट विश्वविद्यालय रहेका छन्।

एफबीआईले नयाँ घटनाबारे प्रत्यक्ष टिप्पणी नगरे पनि भन्यो, “हामी विश्वविद्यालयहरूमा भएको स्वाटिङ घटनाबारे सचेत छौँ र स्थानीय कानुन कार्यान्वयन निकायहरूसँग सहकार्य गरिरहेका छौँ।”

एजेन्सीका अनुसार, यस्ता हरेक झूटा रिपोर्टले कानुन कार्यान्वयन गर्ने निकायलाई खतरामा पार्छ, हजारौँ डलर खर्च हुन्छ र सबैभन्दा महत्त्वपूर्ण कुरा, निर्दोष मानिसहरूलाई जोखिममा पार्छ।

२०२३ मा एफबीआईले यस्ता होक्स ट्र्याक गर्न डाटाबेस सुरु गरेको थियो, जसमा हालसम्म “हजारौँ घटना” दर्ता भइसकेका छन्। यस्ता झूटा रिपोर्टका कारण प्रहरीले कहिलेकाहीँ निर्दोष मानिसमाथि गोली चलाउने वा ज्यान लिनेजस्ता घटनाहरू पनि भएका छन्।

गत वर्ष बेलायतका एक व्यक्तिमाथि पहिलो पटक स्वाटिङ होक्सको अभियोग लगाइएको थियो। अमेरिकाको मेरिल्यान्ड राज्यमा प्रहरीलाई झूटा अपहरणको खबर दिइएको थियो, जसपछि प्रहरीले पीडितलाई प्लास्टिकको गोली प्रहार गरेको थियो। एफबीआईका अनुसार यस्ता अपराधमा संलग्न युवाहरूलाई जेल सजाय सुनाइएको छ।