वाशिंगटन डीसीमा अपराध र होमलेसनेसविरुद्ध कारबाहीको घोषणा गर्दै ट्रम्पद्वारा नेशनल गार्ड तैनाथ
प्रकाशित मिति : श्रावण २६, २०८२ सोमबार
राष्ट्रपति डोनाल्ड ट्रम्पले सोमबार, अगस्ट ११, २०२५ मा वाशिंगटनमा ह्वाइट हाउसको जेम्स ब्राडी प्रेस ब्रीफिंग रुममा पत्रकारहरूसँग कुरा गर्दै । (एपी फोटो/एलेक्स ब्रान्डन)
राष्ट्रपति डोनाल्ड ट्रम्पले सोमबार डिसी प्रहरीलाई सिधै संघीय नियन्त्रणमा राख्ने र अपराधविरुद्ध लड्न वासिङ्टनका सडकहरूमा नेशनल गार्ड तैनाथ गर्ने घोषणा गरेका छन् । यो कदमले सहरको नेतृत्वलाई कानून प्रवर्तन निर्णय गर्ने अधिकारबाट वञ्चित गरेको छ भने राजधानीका बासिन्दाहरूलाई घरेलु रूपमा खटाइएका सैन्य बलसँग अप्रत्याशित मुठभेडको जोखिममा पार्न सक्छ।
महानगर प्रहरी विभागको जिम्मा लिने र ८०० नेशनल गार्ड सैनिकहरू तैनाथ गर्ने निर्णय राष्ट्रपतिले अमेरिकाका सहरहरूलाई अपराध नियन्त्रणबाहिरका स्थानको रूपमा चित्रित गरिरहेका बेलामा आएको हो । यद्यपी धेरै प्रमुख सहरहरूमा हत्याको स्तर दशकहरू यताकै सबैभन्दा तल्लो बिन्दुमा पुगेको दुई वर्ष भइसकेको छ।
प्रशासनले यसअघि एफबीआईका एजेन्टहरूलाई कारज्याकिङ र हिंसात्मक अपराधहरू रोक्न स्थानीय कानून प्रवर्तनलाई सहयोग गर्न रातभरको सिफ्टमा परिचालन गरेको अधिकारीहरूले बताएका छन्। वासिंटन डिसी राज्य नभएकाले संघीय सरकारसँग त्यहाँका बासिन्दा र नेताहरूको आपत्तिको बाबजुद हस्तक्षेप गर्ने असाधारण र व्यापक अधिकार छ, जसले राष्ट्रपतिलाई शहरी अपराध-नियन्त्रणका लागि एक सैनिकीकृत दृष्टिकोणको प्रयोगशालाको रूपमा प्रयोग गर्ने अवसर दिएको छ।
ट्रम्पले वासिंटन डिसीका सडकहरूमा कानून प्रवर्तनको एक व्यापक दृष्टिकोण प्रस्तुत गर्दै संघीय एजेन्टहरू, डिसी प्रहरी र नेशनल गार्डले जिल्ला भित्रका कानून उल्लङ्घन गर्नेहरूमाथि शारीरिक बल प्रयोग गर्ने घोषणा गरेका छन् ।
“उनीहरू तबसम्म लड्छन् जबसम्म तपाईंले उनीहरूलाई तहसनहस पार्नुहुन्न, किनकि यही एक मात्र भाषा हो जुन उनीहरूले बुझ्छन्,” ट्रम्पले ह्वाइट हाउसको पत्रकार सम्मेलनमा पत्रकारहरूलाई भने। ट्रम्पले राजधानीमा अपराध बढिरहेको रूपमा चित्रण गरेका छन्। डिसीकी मेयर मुरियल इ. बाउसर (डी) ले २०२३ मा महामारीपछि भएको तीव्र वृद्धिपछि पछिल्ला दुई वर्षमा हिंसात्मक अपराध घटेको बताउँदै आएकी छिन् ।
ट्रम्पले वासिङ्टनका लागि आफ्ना योजनाहरूलाई अमेरिका-मेक्सिको सीमामा आप्रवासनको उनको प्रशासनको आक्रामक कार्यान्वयनसँग तुलना गरे, जहाँ उनको कार्यकालको सुरुदेखि नै सीमापारका गतिविधिहरूलाई रोक्न नेशनल गार्ड र सेनाका अन्य शाखाहरू तैनाथ गरिएको थियो।
राष्ट्रपतिले ड्रग इन्फोर्समेन्ट एडमिनिस्ट्रेशनका प्रशासक टेरी कोललाई महानगर प्रहरी विभागको प्रमुखमा नियुक्त गरेको बताए। भर्जिनियाका पूर्व सार्वजनिक सुरक्षा सचिव कोलले जुलाईमा डीईएका प्रमुखको रूपमा शपथ लिएका थिए। ट्रम्पले कति लामो समयसम्म सहरको कानून प्रवर्तन क्षमताहरू नियन्त्रणमा लिने उद्देश्य राखेका छन् भन्ने कुरा तत्काल स्पष्ट छैन ।
‘होम रुल एक्ट’ अन्तर्गत ट्रम्पले “आपतकालीन प्रकृतिका विशेष अवस्थाहरू विद्यमान छन् जसका लागि संघीय उद्देश्यका लागि महानगर प्रहरी बलको प्रयोग आवश्यक छ” भन्ने निर्धारण गरेमा उनले ४८ घण्टाका लागि डिसी प्रहरीको नियन्त्रण लिन सक्छन्। राष्ट्रपतिले डिसी मामिलाहरूको निरीक्षण गर्ने कङ्ग्रेसका सदस्यहरूलाई सूचित गरेमा आपतकालीन नियन्त्रणलाई कुल ३० दिनसम्म बढाउन सक्छन्। ३० दिनभन्दा बढीको कुनै पनि अनुरोधलाई कानूनमा पारित गर्नुपर्छ। ट्रम्पले सोमबार हस्ताक्षर गरेको कार्यकारी आदेशले ‘होम रुल एक्ट’ अन्तर्गत “अनुमति दिइएको अधिकतम अवधिका लागि” डिसी कानून प्रवर्तनको जिम्मा लिने घोषणा गरेको छ ।
ट्रम्पले बारम्बार वासिङ्टनमा अपराध र सहरका घरबारविहीन जनसंख्याको बारेमा गुनासो गरेका छन्, तर हालैका दिनहरूमा एक पूर्व कर्मचारीमाथि भएको आक्रमणले उनलाई थप कारबाही गर्न प्रेरित गरेको छ, जसलाई कथित कारज्याकिङमा चोट लागेको थियो । आक्रमणको केही समयपछि डिसी प्रहरीले मेरील्याण्डका १५ वर्षका एक केटा र एक केटीलाई पक्राउ गर्यो र उनीहरूलाई निशस्त्र कारज्याकिङको आरोप लगाइएको थियो।
गत हप्ता ट्रम्पले रगतले लतपतिएको, सर्ट बिना भुइँमा बसिरहेको कोरिस्टाइनको तस्बिर पोस्ट गर्दै डिसीले आफ्नो अवस्था नसुधारेमा सहरको संघीय नियन्त्रण लिनुबाहेक कुनै विकल्प नहुने चेतावनी दिएका थिए ।
सोमबार एटोर्नी जनरल पाम बन्डी, अमेरिकी अधिवक्ता जिनिन पिरो, एफबीआई निर्देशक काश पटेल, रक्षा मन्त्री पीट हेगसेथ र आन्तरिक मन्त्री डग बर्गम लगायतका शीर्ष अधिकारीहरूले घेरेका ट्रम्पले वासिङ्टनमा अपराध-नियन्त्रणलाई संघीयकरण गर्ने आफ्नो व्यापक योजनाहरू घोषणा गरे। “उनीहरूलाई हाम्रो राजधानीलाई संसारले हेर्ने गरी एक उजाडभूमिमा परिणत गर्न दिइने छैन,” उनले भने।
बन्डीले बारम्बार अपराधले पर्यटकहरूलाई कसरी असर गर्छ भन्ने बारेमा कुरा गरिन् । ट्रम्पले मे महिनामा नियुक्त गरेकी पिरोले सोमबार नाबालिगहरूलाई वयस्कको रूपमा आरोप लगाउनको लागि उमेर सीमा १४ मा झार्न चाहेको बताइन्। सहरका नेताहरूले वासिङ्टनमा अपराधको ट्रम्पको चित्रणमा विवाद गरेका छन् । राजधानी एक वर्षअघिको तुलनामा सुरक्षित रहेको उनीहरुको तर्क छ । डिसी प्रहरीका तथ्याङ्कअनुसार २०२४ को यस समयको तुलनामा हिंसात्मक अपराध २६ प्रतिशतले घटेको छ। हत्या १२ प्रतिशतले घटेको छ।
डिसी प्रहरीले यस वर्ष लगभग ९०० नाबालिगहरूलाई पक्राउ गरेको छ — गत वर्षको सोही अवधिको तुलनामा लगभग २० प्रतिशत कम हो । ती मध्ये करिब २०० आरोपहरू हिंसात्मक अपराधका लागि हुन्, र कम्तीमा ४८ वटा कारज्याकिङका लागि छन्।
जर्ज फ्लोइडको प्रहरी हत्यापछि २०२० मा भएको जातीय न्याय प्रदर्शनका क्रममा ट्रम्पले शान्तिपूर्ण प्रदर्शनहरूलाई जबरजस्ती हटाउन नेशनल गार्ड र संघीय कानून प्रवर्तनलाई आह्वान गर्दा उनको पहिलो कार्यकालमा पनि संघीय बलहरूको प्रयोगमाथि तीव्र ध्यान केन्द्रित भएको थियो।राज्यका गभर्नरहरुभन्दा फरक डिस्ट्रिक्ट अफ कोलम्बियाको आफ्नो नेसनल गार्डमाथि नियन्त्रण हुँदैन, जसले राष्ट्रपतिलाई नेशनल गार्ड परिचालन गर्न व्यापक छुट दिन्छ। ट्रम्प प्रशासनले ट्रम्पको कारबाहीको एक हिस्साको रूपमा वाशिङ्टनमा १२० एफबीआई एजेन्टहरूलाई अस्थायी रूपमा राति गस्ती गर्न पठाउन सुरु गरिसकेको छ।