इजरायली आक्रमणमा अल जजिराका पाँच पत्रकार मारिए
प्रकाशित मिति : श्रावण २५, २०८२ आईतबार
गाजामा इजरायली आक्रमणमा परी अल जजिराका पाँच जना पत्रकार मारिएका छन्।
गाजा सहरको अल शिफा अस्पताल नजिकै पत्रकारहरूका लागि बनाइएको टेन्टमा इजरायलले गरेको आक्रमणमा उनीहरूको मृत्यु भएको हो।
अल जजिराका अनुसार मृतक पत्रकारहरूमा संवाददाता अनस अल शरीफ, मोहम्मद कुरैकेह, क्यामेराम्यान इब्राहिम जाहेर, मोहम्मद नौफल र मोआमेन अलिवा रहेका छन्।
अल जजिराले यो घटनालाई पत्रकारितामाथिको “स्पष्ट र पूर्वनियोजित आक्रमण” भनेर निन्दा गरेको छ। आक्रमणलगत्तै इजरायली रक्षा बल (आईडीएफ)ले टेलिग्राममार्फत अनस अल शरीफ लाई लक्षित गरी आक्रमण गरिएको पुष्टि गरेको थियो।
आईडीएफले उनलाई “हमासको एक आतंकवादी समूहको प्रमुख” भनी आरोप लगाएको छ। तर, अन्य मारिएका पत्रकारबारे भने केही उल्लेख गरिएको छैन।
यो आक्रमणमा कुल सात जनाको मृत्यु भएको अल जजिराले जनाएको छ। सुरुमा चार पत्रकार मारिएको बताए पनि केही घण्टापछि यो संख्या पाँच पुगेको थियो।
अल जजिराका प्रबन्ध सम्पादक मोहम्मद मोवाद का अनुसार अनस अल शरीफ एक मान्यताप्राप्त पत्रकार थिए र युद्धभर गाजाका घटनाबारे संसारलाई जानकारी दिने “एक मात्र आवाज” थिए।
युद्ध सुरु भएदेखि नै इजरायलले अन्तर्राष्ट्रिय पत्रकारहरूलाई गाजामा स्वतन्त्र रूपमा रिपोर्टिङ गर्न दिएको छैन, जसले गर्दा धेरै अन्तर्राष्ट्रिय सञ्चार माध्यमहरूले स्थानीय पत्रकारमाथि भर पर्नुपरेको छ।
मृत्यु हुनुअघि २८ वर्षीय अल शरीफ ले सामाजिक सञ्जाल ‘एक्स’ मा गाजा सहरमा भइरहेको तीव्र हवाई आक्रमणबारे चेतावनी दिएका थिए। उनको मृत्युपछि प्रकाशित गरिएको एउटा पोस्ट भने उनले पहिले नै लेखेको र एक साथीमार्फत प्रकाशित गरिएको बताइएको छ।
गत महिना मात्रै अल जजिरा मिडिया नेटवर्क, संयुक्त राष्ट्रसंघ र कमिटी टू प्रोटेक्ट जर्नालिस्ट्स (सीपीजे) ले छुट्टाछुट्टै वक्तव्य जारी गर्दै अल शरीफ को सुरक्षाको लागि आग्रह गरेका थिए।
सीपीजेका अनुसार, अक्टोबर २०२३ मा इजरायलले गाजामा सैनिक आक्रमण सुरु गरेदेखि अहिलेसम्म १८६ जना पत्रकारको मृत्यु भएको पुष्टि भएको छ।