पेन्सिल्भेनियामा दुई प्रहरी अधिकारीमाथि गोली प्रहार
प्रकाशित मिति : श्रावण २२, २०८२ बिहीबार
अमेरिकाको पेन्सिल्भेनियामा दुई प्रहरी अधिकारीमाथि गोली प्रहार भएको छ। त्यहाँका गभर्नर जोश शापिरोले घटनाको पुष्टि गरेका छन्।
राज्य प्रहरीका अनुसार, दुवै प्रहरी अधिकारीलाई एकै पटक गोली हानिएको हो। गम्भीर घाइते भएका उनीहरू दुवैलाई स्थानीय अस्पताल पुर्याइएको छ।
प्रहरी अधिकारीहरूका अनुसार, घटनामा संलग्न संदिग्ध व्यक्तिलाई प्रहरीले गोली हानी मारेको छ।
गोली चलाउनुको कारण वा प्रहरी अधिकारीहरू कुन प्रकारको कलमा गएका थिए भन्ने कुरा भने अझै स्पष्ट भएको छैन।
यो घटना पेन्सिल्भेनियाको स्क्रान्टन सहरबाट करिब ४० माइल उत्तरमा भएको हो। गभर्नर शापिरोले फिलाडेल्फियाबाहिरको एक कार्यक्रममा सहभागी भइरहेका बेला गोलीकाण्डको जानकारी दिएका थिए।
घाइते भएका दुई राज्य प्रहरी अधिकारी जोसेफ पेरेचिन्स्की र विलियम जेन्किन्स हुन्। प्रहरीका अनुसार, गोली लागेपछि उनीहरू गम्भीर घाइते भएका थिए।
राज्य प्रहरीले संदिग्ध व्यक्तिसँग राइफल रहेको बताएको छ। प्रहरीले आदेश पालन गर्न भने पनि ती व्यक्तिले अस्वीकार गरेकाले उनलाई घटनास्थलमै गोली हानी मारिएको प्रहरीको भनाइ छ।