अमेरिकी राष्ट्रपति ट्रम्प र जेलेन्स्कीबीचको सम्बन्धमा सुधार, जेलेन्स्की खुशी

नेपाल डेस्क

---

प्रकाशित मिति : श्रावण २०, २०८२ मंगलबार

यूक्रेनी राष्ट्रपति भोलोडिमिर जेलेन्स्कीले अमेरिकी राष्ट्रपति डोनाल्ड ट्रम्पसँग रुसमाथि प्रतिबन्ध, रक्षा सहकार्य र ड्रोन उत्पादनबारे ‘उपयोगी’ वार्ता भएको बताएका छन् ।

यो वार्ता अमेरिकी दूत स्टिभ विटकोफको मस्को भ्रमणअघि भएको हो। जेलेन्स्कीले रुस प्रतिबन्धको सम्भावनामा विशेष रूपले संवेदनशील देखिएको बताए ।

राष्ट्रपति ट्रम्पले यदि रुसले शुक्रबारसम्म यूक्रेनसँग युद्धविराम गर्न सहमति नजनाएमा उसमाथि कडा प्रतिबन्ध लगाइने चेतावनी दिएका थिए । साथै रुससँग व्यापार गर्ने अन्य देशहरूलाई पनि दोस्रो स्तरको प्रतिबन्ध लागु गर्ने उनले बताएका थिए ।

यसै सन्दर्भमा अमेरिकी दूत स्टिभ विटकोफ मस्को पुग्नेछन् । त्यहाँ राष्ट्रपति भ्लादिमिर पुटिनसँग भेट गर्ने अपेक्षा गरिएको छ । यद्यपि, रुसले ट्रम्पको प्रतिबन्धको चेतावनीलाई खासै महत्व दिएको छैन ।

खसोखास निशुल्क सब्सक्राइब गर्नुहोस् 🙏

अब तपाईँले अमेरिकी भिसा, ग्रीनकार्ड लगायत सम्पूर्ण अध्यागमन अद्यावधिकहरू तथा आवास, कर, स्वास्थ्य सेवा लगायतका विषयमा सूचना र स्रोतहरू छुटाउनु पर्नेछैन। ती सबै सिधै तपाईँको इनबक्समा प्राप्त गर्नुहुनेछ।

इमेल ठेगाना यहाँ प्रविष्ट गर्नुहोस्…

सब्सक्राइब गर्न यहाँ क्लिक गर्नुहोस्

क्रेमलिनका प्रवक्ता दिमित्री पेस्कोभले लामो समयदेखि प्रतिबन्ध झेल्दै आएकाले अर्थतन्त्रमा अब केही हदसम्म प्रतिरोध क्षमता विकास भइसकेको बताए ।

पुटिनलाई प्रतिबन्धले असर गर्छ या गर्दैन भन्ने निश्चित छैन । तर ट्रम्पले रुसका व्यापार साझेदारहरू अमेरिकी शुल्कले प्रभावित हुने र उनीहरुले रुसको तेल किन्ने प्रक्रिया नै बन्द गर्न थाल्ने अपेक्षा गरेका छन् ।

जसले युद्ध चलाउन आवश्यक पर्ने क्रेमलिनको राजस्वमा ठूलो धक्का पुर्याउन सक्ने ट्रम्पको दाबी रहेको छ । यसैबीच, ट्रम्पले भारतमाथि कडा शुल्क लगाउने घोषणा गरे । भारत रुसको ठूलो तेल खरिदकर्ता हो।

ट्रम्पले यसअघि बारम्बार रुसले यूक्रेनी सहरहरूमा गरेको बम आक्रमणप्रति असन्तोष प्रकट गरेका थिए । गत फेब्रुअरीमा ट्रम्प र जेलेन्स्कीबीच ह्वाइट हाउसमा भएको एक असफल बैठकपछि जेलेन्स्कीलाई त्यहाँबाट बाहिरिन भनिएको थियो ।

सो बैठकमा ट्रम्पले जेलेन्स्कीलाई अमेरिकी सहायता प्रतिको कदर नगरेको र ‘तेस्रो विश्वयुद्धको खेल’ खेलिरहेको आरोप लगाएका थिए।

तर पछिल्ला महिनाहरूमा दुवै नेताबीचको सम्बन्धमा सुधार आएको देखिन्छ । जुलाईमा ट्रम्पले अमेरिका आफ्ना ‘सर्वोत्तम’ हतियारहरू नाटो सदस्य राष्ट्रहरूलाई बिक्री गर्नेछ र ती देशहरूले ती हतियारहरू यूक्रेनलाई पठाउने घोषणा गरेका थिए ।

यस योजनाअनुसार डेनमार्क, नर्वे, नेदरल्यान्ड्स र स्वीडेनले पहिलो चरणमा हतियार खरिद गर्ने भएका छन् ।

उनीहरूको संयुक्त योगदान १ बिलियन डलरभन्दा बढी हुने र यो रकम हवाई सुरक्षा उपकरण र गोलाबारुदमा खर्च गरिनेछ ।