न्यूयोर्क गोलीकाण्ड अपडेट : गोली लागेका ५ मध्ये प्रहरी अधिकृतसहित ४ को मृत्यु भएको पुष्टि
प्रकाशित मिति : श्रावण १२, २०८२ सोमबार
By 345 Park Avenue – https://x.com/BNODesk/status/1949972693618438500/photo/1, Public Domain, https://commons.wikimedia.org/w/index.php?curid=170893643
अमेरिकाको न्युयोर्कमा भएको गोलीकाण्डमा गोली लागेका ५ मध्ये प्रहरी अधिकृतसहित ४ को मृत्यु भएको पुष्टि भएको छ । बन्दुकधारीले आत्महत्या गरेका छन । न्युयोर्क सिटीका मेयर एरिक एडम्सले पत्रकार सम्मेलनमार्फत मिडटाउन म्यानह्याटनमा भएको गोलीकाण्डको पुष्टि गरेका छन ।
उनले ५ जनालाई गोली लागेको बताएका छन । गोली लागेका ५ मध्ये ४ जनाको मृत्यु भइसकेको उनले पुष्टि गरे । मारिनेमा एकजना प्रहरी अधिकृत रहेको र उनकी श्रीमती गर्भवती रहेको पत्रकार सम्मेलनमा बलाइएको हो ।
गोलीकाण्डमा मारिएका प्रहरी अधिकारी बंगलादेशबाट आएका आप्रवासी रहेका मेयर एडम्सले बताए । उनका अनुसार ती प्रहरी अधिकारी विगत ३ वर्षभन्दा बढी समयदेखि प्रहरी सेवामा कार्यरत थिए ।
न्युयोर्क शहरको मिडटाउन म्यानह्याटनको पार्क एभेन्यूमा सोमबार साँझ एकजना बन्दुकधारीले कम्तीमा चार जनामाथि गोली चलाएर हत्या गरेका हुन । मृतक मध्ये एक जना न्युयोर्क प्रहरी विभागका अधिकृतसमेत रहेका छन् ।
सन्दिग्ध आक्रमणकारीले पछि आफूलाई गोली हानेर आत्महत्या गरेका छन । गोलीकाण्ड ३४५ पार्क एभेन्यू स्थित ६३४ फिट अग्लो भवनमा भएको हो । नेशनल फुटबल लिग, ब्ल्याकस्टोन, र जेपी मोर्गन चेस जस्ता ठूला कर्पोरेट अफिसहरू उक्त भवनमा रहेका छन् ।
आक्रमणकारी लस भेगासका २७ वर्षीय शेन डेभोन तामुरा रहेको प्रहरीले बताएको छ । प्रहरीले बताए अनुसार आक्रमणकारीको मानसिक स्वास्थ्यसम्बन्धी समस्या रहेको थियो । गोलीकाण्डको उद्देश्यबारे भने अनुसन्धान जारी रहेको छ ।
प्रहरी कमिश्नर जेसिका टिशका अनुसार गोलीकाण्डमा संलग्न आक्रमणकारीको मानसिक स्वास्थ्यसम्बन्धी विगतमा समस्या रहेको लस भेगासका अधिकारीहरूले पुष्टि गरेका छन्।
आक्रमणकारीले साँझ ६:४० बजे भवनको लबीमा प्रहरी अधिकृतसँग गोली हानेर दोहोरो फायरिङ सुरु गरेका थिए । त्यसपछि ३३ औँ तल्लामा गइ उनले आत्महत्या गरे ।
उनको शव सिँढीको भित्री भागमा बन्दुकसहित फेला परेको थियो। एक भिडियोमा लामो राइफल बोकेका आक्रमणकारी भवनभित्र छिर्दै गरेको देखिन्छ । साँझ ७ बजेतिर केही मानिसहरू भवनबाट बाहिर निस्कँदै गर्दा हात उठाएर जाँदै गरेको दृश्य पनि भिडियोमा देखिएको छ।
मेयर एरिक एडम्स ले नागरिकहरूलाई पार्क एभेन्यू र ईस्ट ५१ औं स्ट्रीट आसपास नजान चेतावनी दिएका छन । गभर्नर केथी होचुल र संघीय न्यायाधिवक्ता पाम बोन्डी ले पनि घटनाबारे जानकारी दिँदै एफबीआई र अन्य निकायहरूले सहयोग गरिरहेको बताएका छन ।
गन भायोलेन्स आर्काइभका अनुसार यो घटना अमेरिका भित्र यस वर्षकै २५४ औं सामूहिक गोलीकाण्ड हो । उनीहरूका अनुसार एउटा घटनालाई “सामूहिक गोलीकाण्ड” भन्नका लागि कम्तीमा चार जनामाथि गोली हानिएको वा मारिएको हुनुपर्छ ।
यो घटना न्युयोर्क शहर र अमेरिकाभरि नै आमनागरिकको सुरक्षा, हतियार नियन्त्रण, र आपराधिक हिंसाको विषयमा गम्भीर प्रश्न खडा गर्ने घटना बनेको छ ।