अमेरिकामा एमआरआई मेसिनले लियो ज्यान
प्रकाशित मिति : श्रावण ४, २०८२ आईतबार
अमेरिकाको न्यूयोर्कस्थित वेस्टबरी सहरमा एमआरआई मेसिनमा तानिँदा एकजनाको ज्यान गएको छ । उनी एमआरआई मेसिनमा तानिएपछि गम्भीर घाइते भएका थिए । पछि उनलाई चिकित्सकले मृत घोषणा गरेका थिए ।
नासाउ काउन्टी प्रहरी विभागका अनुसार पीडित ६१ वर्षीय पुरुष एमआरआई मेसिनमा स्क्यान भइरहेको बेला गल्तीले त्यस्तो कोठामा प्रवेश गरेका थिए । तर उक्त कोठामा जान अनुमति भने थिएन।
प्रहरीले जनाएअनुसार ती व्यक्ति गह्रौं फलामको सिक्री लगाएको अवस्थामा एमआरआई कोठामा प्रवेश गरेका थिए ।
अनुमति नै नभएको कोठामा प्रवेश गरेका उनलाई मेसिनको शक्तिशाली चुम्बकीय बलले तानेको प्रहरीले बताएको छ । यस घटनाका कारण उनलाई गम्भीर चिकित्सकीय असर परेको थियो ।
घटनापछि तत्कालै उनलाई स्थानीय अस्पताल पुर्याइएको थियो । घटनाबारे थप अनुसन्धान भइरहेको प्रहरीले बताएको छ ।
एमआरआई भनेको चुम्बकीय शक्ति प्रयोग गरेर कम्प्युटरको सहायताले शरीरभित्रको अवस्थालाई जस्ताको त्यस्तै तस्वीरमा खिचेर देखाउने मेडिकल उपकरण हो । एमआरआईको पूरा रुप म्याग्नेटिक रेजोनेन्स इमेजिङ हो ।
शरीरको टाउकोदेखि पैतालासम्मको भागको समस्याको पहिचान गर्न र उपचारमा निगरानी गर्न एमआरआईको प्रयोग हुन्छ ।
शरीरभित्र धातु जडान गरिएको छ भने एमआरआई गर्न मिल्दैन । स्क्यान गर्ने क्रममा आउने आवाजले भित्र हुँदा एक किसिमको डर नै पैदा हुनसक्ने चिकित्सकहरुले बताएका छन ।
गुफामा छिरेको जस्तो भएर कतिपयलाई आत्तिने र निस्सासिएको जस्तो अनुभव हुनसक्छ । एमआरआईले शरीरको भित्री संरचना मस्तिष्क, मेरुदण्ड, जोर्नी, अंगहरूको विस्तृत चित्र लिन मद्दत गर्छ ।
गर्भवस्थामा एमआरआई गर्नुपर्ने अवस्था छ भने विशेष सावधानी अपनाएर मात्र गर्नुपर्ने हुन्छ । यो प्रक्रियामा समस्या अनुसारको समय लाग्न सक्छ । न्यूनतम १५ मिनेटदेखि अधिकतम ५० मिनेटसम्मको लामो समय प्रक्रियामा लाग्न सक्छ ।
आजभोलि सानो समस्या हुँदा पनि हचुवाको भरमा एमआरआई गराउनेहरु पनि बढिरहेका छन । सबै समस्यामा एमआरआई मात्र सुरक्षित विकल्प नहुन सक्छ । कतिपय केसमा एमआरआई भन्दा सिटी स्क्यान प्रभावकारी हुनसक्ने चिकित्सकहरुले सुझाव दिएका छन ।