रूसको राजधानी मस्कोलक्षित युक्रेनी ड्रोन आक्रमण, रातभरमै ७३ ड्रोन खसालिएको दाबी
प्रकाशित मिति : श्रावण २, २०८२ शुक्रबार
युक्रेनी ड्रोनहरूले बिहीबार राति रूसको विभिन्न क्षेत्रहरूमा आक्रमण गरेपछि रूसको वायु सुरक्षा प्रणालीले ७३ वटा ड्रोन खसालेको रूसी रक्षा मन्त्रालयले शुक्रबार पुष्टि गरेको छ। तीमध्ये तीनवटा ड्रोन राजधानी मस्कोतर्फ गइरहेका थिए।
रक्षा मन्त्रालयले टेलिग्राममार्फत दिएको जानकारी अनुसार, ती ड्रोनहरूमध्ये अधिकांश रूसको दक्षिणपश्चिमी क्षेत्रमा खसालिएका हुन्। विशेषगरी युक्रेनसँग सीमाना जोडिएको ब्रायान्स्क क्षेत्रमा मात्र ३१ वटा ड्रोनहरू खसालिएको उल्लेख गरिएको छ। अन्य केही ड्रोनहरू ओर्ल, बेल्गोरोद र कुर्स्क क्षेत्रहरूमा पनि खसालिएको अनुमान गरिएको छ।
मस्कोका मेयर सर्गेई सोब्यानिनले टेलिग्राममार्फत जनाएअनुसार, राजधानीतर्फ आउँदै गरेका तीन ड्रोनहरू नष्ट गरिएपछि तिनका टुक्राहरू जमिनमा खसेका छन्। यद्यपि हालसम्म कुनै मानवीय क्षति वा भौतिक संरचनाको क्षतिको खबर छैन।
उनले भने, “आपतकालीन सेवा टोलीहरूले ड्रोनका टुक्रा खसेका क्षेत्रहरूमा जाँच गरिरहेका छन्। जनतालाई सतर्क रहन अनुरोध गरिएको छ।”
ड्रोन आक्रमणपछि रूसको संघीय उड्डयन निकाय रोसाभियात्सियाले सुरक्षा कारण देखाउँदै डोमोदेदोभो र झुकोभस्की विमानस्थलहरूबाट उडान सञ्चालनलाई केही समयका लागि स्थगित गरेको थियो। पछि ती विमानस्थलहरूबाट सेवा पुनः सुचारु गरिएको रक्षा मन्त्रालयले जनाएको छ।
तेस्रो प्रमुख मस्को विमानस्थल भनुकोभोमा पनि मध्यरातपछि उडानहरू रोकिएको थियो। बिहानपख सुरक्षा अवस्था सामान्य भएपछि विमानस्थलबाट नियमित सेवा सञ्चालनमा ल्याइएको छ।
यस आक्रमणबारे युक्रेनले आधिकारिक टिप्पणी भने गरेको छैन। तर अघिल्ला वक्तव्यहरूमा कीभ प्रशासनले यस्ता आन्तरिक रूसी आक्रमणहरूलाई मस्कोको युद्ध पूर्वाधार नष्ट गर्ने रणनीतिक कदमका रूपमा औंल्याउँदै आएको छ।