युक्रेनलाई पेट्रियट मिसाइल दिने निर्णयपछि ट्रम्पका विशेष दूत कीभमा, जेलेन्स्कीसँग छलफल
प्रकाशित मिति : असार ३०, २०८२ सोमबार
युक्रेनी राष्ट्रपति भोलोडिमिर जेलेन्स्की र अमेरिकाका विशेष दूत कीथ केलेगबीच सोमबार कीभमा उच्चस्तरीय बैठक सम्पन्न भएको छ। उक्त भेटवार्ता अमेरिकी राष्ट्रपति डोनाल्ड ट्रम्पले युक्रेनलाई पेट्रियट मिसाइल प्रणाली उपलब्ध गराउने घोषणा गरेको केही घण्टापछि भएको हो।
राष्ट्रपति जेलेन्स्कीले भेटलाई “उत्पादक” भन्दै युक्रेनको हवाई सुरक्षा बलियो बनाउने, संयुक्त रूपमा हतियार उत्पादन गर्ने तथा युरोपसँग मिलेर हतियार खरिद गर्ने विषयमा कुराकानी भएको जानकारी दिए। साथै, उनले शान्ति स्थापनाको बाटोमा कसरी अगाडि बढ्न सकिन्छ भन्ने कुरामा पनि छलफल भएको उल्लेख गरे।
“हामीले बलियो हवाई सुरक्षा, संयुक्त उत्पादन, र युरोपसँग सहकार्यमा हतियार खरिद लगायत शान्तिलाई नजिक ल्याउने उपायबारे छलफल गर्यौं ।” राष्ट्रपति कार्यालयबाट जारी विज्ञप्तिमा जेलेन्स्कीको भनाइ उद्धृत गरिएको छ।
उनले रुसको आक्रामकता रोक्न अमेरिकाको नेतृत्वको भूमिका अनिवार्य रहेको बताएका छन्। “बल प्रयोग नगरी मस्को रोकिनेवाला छैन,” जेलेन्स्कीले चेतावनी दिँदै थपे, “रुस र उसका सहयोगीमाथि थप कडा प्रतिबन्धको पनि छलफल भयो।”
यो भेट यति बेला भएको हो जब राष्ट्रपति ट्रम्पले युक्रेनका लागि ठूलो मात्रामा सैन्य सहयोग घोषणा गर्न लागेका छन्। अमेरिकी सञ्चारमाध्यमका अनुसार, ट्रम्पले लामो दूरीको मिसाइल र अत्याधुनिक सैन्य प्रणालीहरू समेत समेटिएको नयाँ सहयोग प्याकेज ल्याउन लागेका छन्।
ट्रम्पले उक्त योजना वाशिङ्टनमा नाटो महासचिव मार्क रुटेसँगको उच्चस्तरीय बैठकमा सार्वजनिक गर्ने जनाइएको छ।
यद्यपि वाशिङ्टनको दीर्घकालीन रणनीति अझै स्पष्ट भइसकेको छैन । राष्ट्रपति जेलेन्स्कीका अनुसार केलेगलाई युक्रेनको युद्धक्षेत्र स्थिति र रुसको सैन्य क्षमताबारे पूर्ण खुफिया जानकारी दिइनेछ। यो कामका लागि शीर्ष सेनापति अलेक्जान्दर सिरस्की र अन्द्रिय ह्नातोभलाई जिम्मेवारी दिइएको छ।
केलेगले युक्रेनी गुप्तचर तथा सुरक्षा प्रमुखहरूसँग छुट्टै भेटवार्ता गर्ने कार्यक्रम रहेको छ। “उनीहरूलाई सम्पूर्ण जानकारी दिइनेछ,” जेलेन्स्कीले बताए।
यसैबीच, ट्रम्पले आइतबार पत्रकारहरूसँग कुरा गर्दै युक्रेनलाई पेट्रियट मिसाइल प्रणाली दिने घोषणा गरेका थिए। यद्यपि उनले मिसाइलको सङ्ख्या खुलाएका छैनन्। उनले भने, “हामी त्यसको लागि केही तिर्दैनौं, युरोपेली युनियनले तिर्छ र युक्रेनले हामीलाई १०० प्रतिशत तिर्छ।”
सोमबार थप प्रतिबन्धको घोषणा हुने हो कि भन्ने प्रश्नमा ट्रम्पले भने, “हेरौं, भोलि के हुन्छ।”