अमेरिकी स्वास्थ्य मन्त्री केनेडीविरुद्ध अदालतमा मुद्दा दायर, के हो विवादको कारण ?
प्रकाशित मिति : असार २४, २०८२ मंगलबार
अमेरिकाका प्रमुख स्वास्थ्य सङ्गठनहरूले अमेरिकी स्वास्थ्य मन्त्री रोबर्ट एफ. केनेडी जुनियर र स्वास्थ्य तथा मानव सेवा विभाग (एचएचएस)विरुद्ध संघीय अदालतमा मुद्दा दायर गरेका छन्। उनीहरूले केनेडीद्वारा कोभिड-१९ खोपलाई बालबालिका र गर्भवती महिलाका लागि सीडीसी (रोग नियन्त्रण तथा रोकथाम केन्द्र)को सिफारिस सूचीबाट हटाउने निर्णय सार्वजनिक स्वास्थ्यका लागि “गम्भीर र तत्काल खतरा” भएको दाबी गर्दै उक्त निर्णय खारेज गर्न माग गरेका छन्।
मुद्दा हाल्ने सङ्गठनहरूमा अमेरिकन एकेडेमी अफ पेडियाट्रिक्स (आप), अमेरिकन कलेज अफ फिजिसियन्स (एसीपी), अमेरिकन पब्लिक हेल्थ एशोसिएसन (एपीएचए) र इन्फेक्सियस डिजिज सोसाइटी अफ अमेरिका (आईडीएसए) रहेका छन्। उनीहरुले केनेडीको निर्देशन तत्काल रद्द गर्न संयुक्त रूपमा अदालतसँग आग्रह गरेका छन् ।
केनेडीले सीडीसीको खोप तालिकाबाट कोभिड-१९ खोपलाई हटाउने निर्णय गरेपछि विवाद चुलिएको हो। उनले मे महिनामा स्वस्थ बालबालिका र गर्भवती महिलाका लागि कोभिड-१९ खोपको सिफारिस नगर्ने घोषणा गरेका थिए । आवेदकहरूका अनुसार, यस्तो निर्णय विज्ञान र प्रमाणहरूविरुद्ध जान्छ र यसले लाखौँ नागरिकको स्वास्थ्य जोखिममा पार्नेछ।
मुद्दामा भनिएको छ, “स्वीकृत विज्ञान र प्रमाणमा आधारित खोप प्रणाली, जसले अनगिन्ती अमेरिकीहरूको ज्यान बचाएको छ, त्यो प्रणालीलाई सचिव केनेडीले योजनाबद्ध रूपमा ध्वस्त पार्ने प्रयास गरिरहेका छन्।”
कोभिड खोपलाई सिफारिस सूचीबाट हटाउनुका साथै, केनेडीले सीडीसीअन्तर्गतको खोप सल्लाहकार समिति (एसीआईपी)का सबै १७ सदस्यहरूलाई बर्खास्त गरेका छन्। ती सदस्यहरू खोप नीतिमा विज्ञ मानिन्थे। अब उनले सात जना नयाँ सदस्य नियुक्त गरेका छन्, जसमा कतिपय खोप विरोधी अभिव्यक्ति दिनेहरू पनि छन्।
यद्यपि मुद्दामा एसीआईपीमा गरिएको परिवर्तन समावेश गरिएको छैन, मुद्दा लडिरहेका अधिवक्ता रिचर्ड ह्युजले भने, “हामीलाई आशंका छ कि नयाँ सदस्यहरूले अन्य खोपहरूविरुद्ध पनि नकारात्मक निर्णय लिनेछन्, र त्यस्तो भएमा हामीले मुद्दा परिमार्जन गरेर थप कारबाही अगाडि बढाउनेछौं।”
अमेरिकन एकेडेमी अफ पेडियाट्रिक्सकी अध्यक्ष सुसन क्रेस्लीले पत्रकार सम्मेलनमा भनिन्, “देशभरिका बालरोग विशेषज्ञहरूबाट हामीले थाहा पाएका छौं कि अभिभावकहरू अब सबै प्रकारका खोपहरूमा गम्भीर शंका गर्न थालेका छन्।”
उनका अनुसार, एचएचएसका पछिल्ला निर्णयहरूले कोभिडमात्र होइन, खसरा, दादुरा, पोलियोजस्ता रोगहरूको खोपहरूप्रति पनि जनविश्वास कमजोर पार्दैछ।
स्वास्थ्य तथा मानव सेवा विभाग (एचएचएस) का प्रवक्ताले मुद्दासम्बन्धी कुनै प्रतिक्रिया दिएका छैनन्। केनेडी आफैंले भने यस विषयमा सार्वजनिक अभिव्यक्ति दिएका छैनन्।
मुद्दा दायर गर्ने अधिवक्ता रिचर्ड ह्युजले सुनुवाइ केही साताभित्र हुने अपेक्षा गरेका छन्। सेप्टेम्बरसम्म स्थायी अदालतको आदेश आउने लक्ष्य रहेको बताइएको छ।