इरानी राष्ट्रपतिले भने – ‘अमेरिकासँग संवाद सम्भव, तर इजरायली आक्रमणले विश्वासको संकट’
प्रकाशित मिति : असार २३, २०८२ सोमबार
इरानी राष्ट्रपति मसूद पेजेश्कियानले अमेरिकासँग संवादमार्फत द्वन्द्व समाधान गर्न सकिने विश्वास व्यक्त गरेका छन्। तर उनले हालै अमेरिकी सहयोगमा इजरायलले इरानमाथि गरेको आक्रमणले आपसी विश्वासमा गहिरो क्षति पुगेको बताएका छन्। सोमबार सार्वजनिक भएको एक अन्तर्वार्तामा उनले उक्त धारणा राखेका हुन्।
शनिबार अमेरिकी दक्षिणपन्थी सञ्चारकर्मी टकर कार्लसनलाई दिएको विशेष अन्तर्वार्तामा पेजेश्कियानले भने, “म पूर्ण विश्वासका साथ भन्छु, हामी अमेरिकासँगको द्वन्द्व र मतभेदहरू संवादमार्फत सजिलै समाधान गर्न सक्छौं। तर इजरायली आक्रमणले वार्तामै प्रश्न उठाएको छ।”
इरानी राष्ट्रपति पेजेश्कियानले अमेरिकी राष्ट्रपति डोनाल्ड ट्रम्पलाई चेतावनी दिँदै भने, “इजरायली प्रधानमन्त्री नेतन्याहूको प्रभावमा परेर इरानसँग युद्धमा नफसुन्। अमेरिका शान्तिको बाटो रोज्न सक्छ, अथवा दलदलमा फस्न सक्छ – यो ट्रम्पकै रोजाइमा निर्भर छ।”
उनका अनुसार इरान र अमेरिका बीच वार्ता अघि बढिरहेको बेला जुन १३ मा इजरायलले इरानमाथि आक्रमण सुरु गरेपछि सबै प्रक्रिया ढल्यो। १२ दिनसम्म चलेको हवाई युद्धमा इरानका उच्च सैन्य कमाण्डरहरू र आणविक वैज्ञानिकहरू मारिएका थिए।
“हामी कसरी विश्वास गर्ने कि वार्ताको बीचमै फेरि इजरायललाई आक्रमण गर्न छुट दिइने छैन ?” पेजेश्कियानले प्रश्न गरे। उनले इजरायलमाथि वार्ता भत्काउने मुख्य दोष पनि लगाए।
राष्ट्रपति पेजेश्कियानले इजरायलले आफुलाई पनि निशाना बनाएर हत्या प्रयास गरेको सनसनीपूर्ण दाबी पनि गरे । “हो, उनीहरूले प्रयास त गरे। योजनाबद्ध रूपमा काम गरियो तर उनीहरू असफल भए,” उनले भने।
इरानले सधैंजसो आफूले आणविक हतियार निर्माण गर्ने चाहना नराखेको बताउँदै आएको छ। राष्ट्रपति पेजेश्कियानले पुनः यस कुरा दोहोर्याउँदै भने, “हामी आणविक हतियार बनाउने प्रयासमा छैनौं, तर हाम्रो सुरक्षा सुनिश्चित गर्न वार्ता निष्पक्ष र आक्रमणरहित हुनुपर्छ।”