क्यालिफोर्नियाका सात पुरुषमाथि १०० मिलियन डलरका गरगहना चोरी गरेको अभियोग
प्रकाशित मिति : असार ३, २०८२ मंगलबार
अमेरिकाको क्यालिफोर्नियाका सात जना पुरुषहरूलाई अमेरिकाको इतिहासमै सबैभन्दा ठूलो गरगहना चोरीको घटनामा अभियोग लगाइएको छ ।
उनीहरुविरुद्ध १०० मिलियन अमेरिकी डलर बराबरको सुन, रत्न र विलासी घडीहरू चोरी गरेको अभियोग लगाइएको हो ।
यो चोरी झन्डै तीन वर्षदेखिको क्यालिफोर्नियामा एक रहस्यमय घटनाका रूपमा रहेको थियो ।
ब्रिंक्स कम्पनीको ट्रकले गरगहना बोक्दै गर्दा एउटा ड्राइभर ट्रकभित्र सुतिरहेको र अर्को खाना खाइरहेको बेला ट्रकलाई मध्यरातमा सुनसान स्थानमा लुटिएको थियो।
अमेरिकी न्याय मन्त्रालयले सार्वजनिक गरेको अभियोग अनुसार चोरहरू ट्रकलाई सन फ्रान्सिस्को नजिकको एक गरगहना प्रदर्शनी स्थलबाटै पछ्याउन थालेका थिए ।
ट्रकमा ७३ वटा झोला राखिएको थियो। अर्को बिहान, ट्रक लेबेक क्यालिफोर्नियामा विश्रामका लागि रोकिएको बेला २४ वटा झोला चोरी गरिएको थियो । ती झोलामा गरगहना र विलासी सामग्रीहरू रहेका थिए ।
अभियोगपत्रमा चोरहरूले ट्रकमा कसरी पहुँच पाए भन्ने स्पष्ट गरिएको छैन। ११ जुलाई २०२२ को बिहान अभियुक्तले केही दिनसम्म सन फ्रान्सिस्को नजिकको गरगहना प्रदर्शनी स्थलको निगरानी गरेका थिए । त्यसपछि साथीहरूसहित ट्रक लुटेका थिए।
अभियोग अनुसार, चोरहरूले ब्रिंक्स ट्रकमा गरगहना राखिएको हेरेका थिए । त्यसपछि उनीहरुले करिब ३०० माइल सम्म ट्रकलाई पछ्याइ रहेका थिए ।
ट्रक विश्रामको लागि रोकिने वित्तिकै, २४ वटा झोलाहरू चोरी गरिएको थियो । त्यहाँ रहेको गरगहनाको मूल्य करिब १०० मिलियन डलर रहेको बताइएको छ ।
अधिकारिहरूका अनुसार चोरीका क्रममा कुनै हतियार प्रयोग गरिएको थिएन । खोजतलासको क्रममा १६ जुनमा केही गरगहना बरामद गरिएको अमेरिकी न्याय मन्त्रालयले जनाएको छ।