इजरायली आक्रमणमा इरानका शीर्ष सैन्य कमान्डर सलामी र दुई आणविक वैज्ञानिक मारिए
प्रकाशित मिति : जेष्ठ ३०, २०८२ शुक्रबार
इजरायलले इरानमाथि गरेको हवाई आक्रमणमा कयौं वरिष्ठ इरानी सैन्य अधिकारीहरू र आणविक वैज्ञानिकहरू मारिएका छन । इरानी सरकारी सञ्चारमाध्यमहरूले घटनाको पुष्टि गरेका छन्।
इरानको राज्य सञ्चारमाध्यमअनुसार इस्लामिक रिभोल्युशनरी गार्ड्स का कमाण्डर इन चीफ हुसैन सलामीको इजरायली आक्रमणमा मृत्यु भएको छ । खातम अल अन्बिया सेन्ट्रल हेडक्वार्टरका कमाण्डर गोलामअली रशिदको पनि ज्यान गएको छ ।
आणविक वैज्ञानिक तथा इरानको आणविक ऊर्जा संगठनका पूर्व प्रमुख फरेइदुन अब्बासी पनि इजरायली आक्रमणमा मारिएका छन । आणविक हतियार कार्यक्रममा संलग्न आणविक वैज्ञानिक मोहमद मेहदी तेहरान्चीको पनि ज्यान गएको छ । इरानी सशस्त्र सेनाका चिफ अफ स्टाफ मोहमद बाघेरी गम्भीर घाइते भएका छन ।
इरानका सर्वोच्च नेता आयतोल्लाह अली खामेनेईका वरिष्ठ सल्लाहकार अली शमखानी पनि गम्भीर घाइते भएको इरानी रिपोर्टहरूमा जनाइएको छ।
इजरायलले इरानको आणविक कार्यक्रम रोक्न भन्दै अपरेसन राइजिङ लायन नामक सैन्य अभियान सुरु गरेको बताएको छ । यो अभियानको क्रममा इजरायलले इरानमाथि आक्रमण केन्द्रीत गरेको हो ।
इरानका सर्वोच्च नेता अली खामेनेई ले आक्रमणको कडा निन्दा गर्दै “यो अपराधले जिओनवादी शासनमाथि पीडादायक अवस्था ल्याउनेछ, र उसले त्यसको सामना अवश्य गर्नेछ ” भनेका छन ।
इजरायलका रक्षामन्त्री इजरायल काट्ज ले राष्ट्रिय आपतकाल घोषणा गर्दै इरानबाट छिट्टै क्षेप्यास्त्र र ड्रोन आक्रमणको सम्भावना रहेकोले नागरिकहरू सतर्क रहन आव्हान गरेका छन ।
इरानी समाचार च्यानलहरूका अनुसार राजधानी तेहरानमा विस्फोटपछि धुँवा उठिरहेको दृश्य देखिएको छ । प्रमुख यूरेनियम संवर्द्धन केन्द्र रहेको शहर नतांज , पानी रिएक्टर रहेको स्थल खान्दाब र ब्यालिस्टिक मिसाइल बेस रहेको क्षेत्र खोरामाबादमा इजरायलले निशाना बनाएको छ ।
तेलको मूल्य ९ प्रतिशत भन्दा बढीले बढेको छ । विश्वबजारमा युद्धको आशंकाले उथलपुथल ल्याएको छ। अमेरिकी स्टक बजारमा गिरावट आएको छ ।
इरानले अमेरिकामाथि गम्भीरता नदेखाएको र इरानको “शान्तिपूर्ण आणविक प्रविधिको अधिकार” उल्लंघन गरेको आरोप लगाएको छ।
इजरायलको आक्रमणले इरानको सैन्य तथा आणविक पूर्वाधारलाई ठूलो क्षति पुर्याएको छ । यता इरान बदला लिने प्रतिज्ञामा उत्रिएको छ ।
क्षेत्रीय युद्धको संकेत बलियो बन्दै गइरहेको यो अवस्थामा अबको प्रतिक्रियाले मध्यपूर्वमा शान्ति वा विस्फोटक संघर्ष कुन दिशातर्फ जानेछ भन्ने निर्धारण गर्नेछ ।