वाशिङटन डी सी को नर्थवेस्ट क्षेत्रमा गोली र छुरा प्रहार
प्रकाशित मिति : जेष्ठ २५, २०८२ आईतबार
अमेरिकाको वाशिङटन डी सी को नर्थवेस्ट क्षेत्रमा एकजना पुरुषमाथि गोली प्रहार भएको छ । अरु दुई किशोरलाई छुरा प्रहार गरिएको छ ।
डी सी प्रहरीले जनाए अनुसार शनिबार साँझ करिब ७ बजे डुपन्ट सर्कल पार्कमा किशोरहरूको एउटा समूहबीच झगडा भएको थियो ।
उक्त झगडामा दुई जना किशोरहरू छुरा प्रहारबाट घाइते भएका थिए । छुरा प्रहारबाट घाइते ति किशोरहरुलाई अस्पताल लगिएको छ ।
डुपन्ट सर्कलको दक्षिणतर्फ १९ औं स्ट्रिटमा एक जना पुरुषको खुट्टामा गोली प्रहार भएको छ । घाइते पुरुषलाई अस्पताल लगिएको र उनको अवस्था स्थिर रहेको बताइएको छ।
पक्राउ तथा अनुसन्धानको क्रममा डी सी प्रहरीले पार्कमा उपस्थित भिडलाई तितरबितर बनाएको थियो ।
परिवहन प्राधिकरणका अनुसार अनुसन्धानका कारण डुपन्ट सर्कल मेट्रो स्टेशनको १९ औं स्ट्रिट प्रवेशद्वार अस्थायी रूपमा बन्द गरिएको छ।
यो घटना विश्व प्राइड उत्सवसँग सम्बन्धित छ वा छैन भन्ने अझै पुष्टि भएको छैन । डी सी मा केहि दिन पहिला भएको गोलीकाण्डमा इजरायली दूतावासका २ जना कर्मचारीको हत्या भएको थियो ।
घटनापछि राजधानीको क्षेत्रमा सुरक्षा व्यबस्था कडा बनाइएको थियो । तर गोलीवारीमा घटनाहरु भने भइरहेका छन ।