राष्ट्रपति बाइडेनद्धारा नयाँ ठाउँबाट तेल र ग्यास उत्खनन गर्न प्रतिबन्धको घोषणा, प्रतिबन्ध हास्यास्पद भएको ट्रम्पको प्रतिकृया
प्रकाशित मिति : पुस २२, २०८१ सोमबार
US President Joe Biden addresses the Canadian Parliament in Ottawa, Canada, on March 24, 2023. (Photo by Mandel NGAN / POOL / AFP)
अमेरिकी राष्ट्रपति जो बाइडेनले नयाँ ठाउँमा तेल तथा ग्यास उत्खननमा प्रतिबन्ध लगाएको घोषणा गरेका छन् । डोनाल्ड ट्रम्पले पदभार ग्रहण गर्नुभन्दा केही हप्ता अघि बाइडेनले प्रतिबन्धको घोषणा गरेका हुन् ।
यो प्रतिबन्धले सम्पूर्ण एटलान्टिक तट, पूर्वी गल्फ अफ मेक्सिको, क्यालिफोर्निया, ओरेगन र वाशिङ्टनको प्रशान्त तट, र अलास्काको बेरिङ सागरको एक भागलाई समेट्छ ।
यो निर्णय बाइडेन प्रशासनद्वारा जलवायु परिवर्तन नीति लागू गर्न गरिएका अन्तिम प्रयासहरूमध्ये एक हो ।
ट्रम्पले भने पदभार ग्रहण गरेपछि तुरुन्तै यो प्रतिबन्ध हटाउने प्रतिबद्धता व्यक्त गरेका छन् । तर अमेरिकी कानुनअनुसार यसलाई उल्ट्याउन कठिन हुन सक्छ ।
ट्रम्पले आफ्नो चुनावी अभियानमा घरेलु जीवाश्म इन्धन उत्पादनलाई बढावा दिने र ग्यासको लागत घटाउने प्रतिबद्धता जनाएका थिए ।
नयाँ प्रतिबन्ध घोषणा गर्दै बाइडेनले तटीय क्षेत्रमा हुने उत्खनन अर्थात ड्रिलिङले अपरिवर्तनीय क्षति पुर्याउन सक्ने बताए ।
यो जोखिम हो यो जोखिम लिन अमेरिकालाई आवश्यक छैन बाइडेनले भनेका छन । ट्रम्पले यो प्रतिबन्धलाई हास्यास्पद भन्दै खारेज गर्ने घोषणा गरे ।
ट्रम्पले यसअघि पनि बाइडेनको संरक्षण र जलवायु परिवर्तन सम्बन्धी नीतिहरू उल्ट्याउने वाचा गरेका थिए । यो नयाँ प्रतिबन्ध लगाउने घोषणा बाइडेनले १९५३ को आउटर कन्टिनेन्टल सेल्फ ल्याण्ड्स एक्ट अन्तर्गत गरेका हुन् ।
जसले अमेरिकी राष्ट्रपतिलाई खनिज पट्टा र ड्रिलिङबाट क्षेत्र हटाउन अनुमति दिन्छ । ट्रम्पले पनि २०२० मा फ्लोरिडाको तटीय क्षेत्रलाई जोगाउन यो कानुन प्रयोग गरेका थिए ।
त्यो निर्णय २०३२ सम्मका लागि मान्य थियो । बाइडेनको निर्णयले त्यही क्षेत्रलाई अनिश्चितकालसम्म जोगाउनेछ । यो नयाँ प्रतिबन्धले ६२५ मिलियन एकड भन्दा बढी जलक्षेत्रलाई समेट्छ ।
तर, वातावरण संरक्षण समूहहरूले यस निर्णयलाई स्वागत गरेका छन् । तेल र ग्यास उद्योग सम्बन्धी समूहहरूले भने बाइडेनको निर्णयले अमेरिकी ऊर्जा सुरक्षामा क्षति पुर्याउने र यसलाई उल्ट्याउनुपर्ने बताएका छन् ।
ट्रम्पले बाइडेनको निर्णयलाई चुनौती दिने प्रयास जारी राख्ने अपेक्षा गरिएको छ । अन्तिम कानुनी निर्णय सर्वोच्च अदालतले गर्न सक्नेछ, जहाँ हाल रिपब्लिकन न्यायाधीशहरूको बहुमत छ ।
पर्यावरणविद्हरू र डेमोक्र्याटहरूले बाइडेनलाई यो प्रतिबन्ध लागू गर्न दबाब दिइरहेका थिए ।
अन्तर्राष्ट्रिय ऊर्जा एजेन्सीका अनुसार, जलवायु परिवर्तनको गम्भीर प्रभावहरू रोक्नका लागि तापमान वृद्धिलाई १.५ डिग्री सेल्सियसमा सीमित गर्न वार्षिक रूपमा तेल र ग्यासको माग ५ प्रतिशत ले घट्नुपर्ने अनुमान छ ।