अमेरिकामा भएको दुर्घटनामा २ नेपाली युवाको मृत्यु, पक्राउ नेपाली चालकविरुद्ध हत्याअभियोग
प्रकाशित मिति : मंसिर ८, २०८१ शनिबार
शुक्रबार बिहान अमेरिकाको भर्जिनिया राज्यको चान्टिलीमा भएको दुर्घटनामा नेपालका दुई युवा, रुकुमका सुरेश केसी र बर्दियाका विवेक सुवेदीको निधन भएको छ। उक्त दुर्घटनामा चालकसहित थप दुई जना घाइते भएका छन्।
सुरेश केसी आठविसकोट नगरपालिका ओलीगाउँ रुकुम पश्चिमका भएको जनाइएको छ । उनी केही महिना अगाडि मात्र अमेरिका आएको जनाइएको छ । विवेक सुवेदी एक इथिकल ह्याकर भएको जनाइएको छ ।
तीव्र गतिमा रहेको फोर्ड मस्टाङ्ग कार सडकछेउको रुखमा ठोक्किएको थियो। यो दुर्घटना चालकको लापरबाहीका कारण भएको प्रहरीको भनाई छ । चालक विजय तामाङ र मोहन श्रेष्ठ घाइते भएका छन्, तर दुवैको अवस्था स्थिर रहेको जनाइएको छ।
३० वर्षीय चालक तामाङलाई प्रहरीले पक्राउ गरेको छ । दुर्घटनाको समयमा तामाङले अत्यधिक मदिरा सेवन गरेका प्रहरीको भनाई छ ।
लाउन काउन्टी प्रहरीले दुर्घटनाको अनुसन्धान जारी राखेको जनाएको छ। तामाङविरुद्ध अनैच्छिक हत्याको आरोप लगाइएको छ र लाउडौन काउन्टी वयस्क डिटेन्सन सेन्टरमा धरौटी बिना राखिएको छ। यो अनुसन्धान जारी छ।