टोरन्टोमा बेपत्ता नेपाली विद्यार्थी प्रजलको खोजीमा सघाउन दूतावासपनि सकृय, परराष्ट्रलाई दिइयो जानकारी
प्रकाशित मिति : भाद्र ८, २०८१ शनिबार
क्यानडाको टोरन्टोबाट बेपत्ता नेपाली विद्यार्थी २२ बर्षीय प्रजल कार्कीको खोजीमा सघाउन ओटावामा रहेको नेपाली दूतावासले पनि सकृयता देखाएको छ । परिवार र समुदायका तर्फबाट आएको अनुरोधपछि दूतावासका तर्फबाट टोरन्टो प्रहरीलाई औपचारिक पत्र लेख्दै कार्कीको खोजीमा तदारुकता देखाउन अनुरोध गरिएको छ ।
२ साता अघि क्यानडामा बेपत्ता कार्कीको अवस्था अझै अज्ञात रहेपछि परिवार र समुदायमा चिन्ता बढेको छ । आफूहरुले यसबारे परराष्ट्र मन्त्रालय काठमाडौंलाई पनि सुचित गरिसकेको दूतावासले जानकारी दिएको छ । प्रहरीलाई अनुरोध गरिएको, खोजी कार्य जारी रहेको र समुदायका तर्फबाट पनि खोजीमा प्रयास भइरहेको विवरणसहित परराष्ट्र मन्त्रालयलाई जानकारी दिइएको हो ।
परिवारका तर्फबाट सामाजिक सञ्जालमा गरिएको पोष्टमा कार्की अगस्त ८ देखि बेपत्ता भएको उल्लेख गरिएको छ । पातलो शरीर भएका उनको कालो कपाल रहेको र ५ दशमलव ५ फिट उचाई रहेको जनाइएको छ ।
प्रजललाई अन्तिम पटक ओन्टारियो स्कारबोरोको वार्डन एभिन्यु र सेन्ट क्लेयर एभिन्यु ईष्ट वरपर देखिएको थियो । कसैसँग कुनै जानकारी भएका वा उनलाई देखेमा तुरुन्तै टोरन्टो पुलिसलाई सम्पर्क गर्न अनुरोध गरिएको छ ।
उनी अध्ययनका लागि क्यानडा आएको जनाइएको छ । दुई वर्षअघि क्यानडा आएका उनी टोरन्टो क्षेत्रको एउटा कलेजमा अध्ययनरत छन् । उनको स्थायी घर नेपालमा झापा रहेको जनाइएको छ ।
साथीहरुसँग बस्दै आएका उनको बेपत्ता हुनु केहीदिन अगाडिसम्म परिवारसँग सम्पर्क भइरहेको जनाइएको छ । घरबाट बुबा बिरामी भएको जानकारी दिदै घरमा आउन आग्रह गरेको केहीदिनपछि उनी सम्पर्कविहिन भएका हुन् ।